vıdeodan skrın
20 jastaǵy Arlan Qusaıynovtyń aıtýynsha, ol sol kúni Talǵar qalasyndaǵy ákimdik mańynda dostarymen birge kólikte bolǵan. Kýágerdiń sózine qaraǵanda, ol ne marqumdy, ne aıyptalýshylardy tanymaıdy.
– Oqıǵa ornynan habar jetken kezde biz birge turǵanbyz. Sol kezde dostarymyzdyń biri – Danııar Janbolattyń anasy qońyraý shalyp, «bir jaqta atys bolyp jatyr, úılerińe qaıtyńdar» dep eskertken. Biz avtobaza jaqqa bet aldyq. Men sońǵy bolyp jettim, sol kezde dostarym tarap ketipti, – dedi Arlan.
Sotta ekinshi bolyp sóz alǵan – Danııar Janbolatuly. Ol sol túni oqıǵaǵa jaqyn mańda ornalasqan «Qamajaı» dúkeniniń janynda bolǵan. Anasy alańdaýshylyqpen habarlasyp, belgisiz bir jaǵdaı oryn alǵanyn jetkizgen. Telefon arqyly jylaǵan daýys estigen Danııar shuǵyl túrde dostarymen birge oqıǵa ornyna barady.
– Biz dúkenniń aldynda birneshe jigittiń jaraqat alǵanyn kórdik. Olar, menińshe, Sherzat Bolattyń dostary bolatyn. Bir jigittiń basynda qatty jaraqat bar edi. Biz tóbeles bolǵan shyǵar dep oıladyq. Mundaı aýyr jaǵdaı bolady dep eshkim kútpedi, – dep eske aldy kýáger.
Danııar Janbolatuly sondaı-aq sol túni túsirilgen beınejazba týraly da aıtty. Onyń sózinshe, bul beınejazba áleýmettik jelilerde taraǵan jáne kórshisiniń tórtinshi qabattaǵy páterinen túsirilgen.
Bul is qazir qoǵam nazarynda tur. Jábirlenýshi tarap pen qoǵam belsendileri sottyń ádil ári ashyq ótýin talap etip otyr. Qoǵamda rezonans týdyrǵan bul qylmystyq istiń sot prosesi jalǵasyp jatyr.
