Búginde qart maıdanger – 103 jasta. Alaıda oıy – tyń, sanasy – sergek. Ol áskerge 1942 jyly alynǵan. Aldymen Sverdlov oblysyndaǵy Týrınsk qalasynda jaýdyń tankterin joıýdyń arnaıy kýrsynan ótedi. Sodan keıin birden Stalıngrad shaıqasyna attanǵan. Odan soń Belorýssııa men Polshany azat etip, Berlındi alýǵa qatysqan. Soǵystan keıin Potsdam qalasyn mınadan tazartady. Maıdandaǵy erlikteri úshin «Qyzyl Juldyz», II dárejeli «Otan soǵysy» ordenderi jáne kóptegen medalmen marapattalǵan.
Ardager ózin arnaıy quttyqtap kelgen Prezıdent janyndaǵy Ulttyq ǵylym akademııasynyń prezıdenti A.Kúrishbaevpen emen-jarqyn áńgimelesip, joryq jyldarynan az-kem estelik aıtty. «Men kórgen zulmat soǵysty endi eshkim kórmesin. Elimiz aman, jastarymyz baqytty ómir keshsin. Beıbit zaman bolsyn!» dep aq batasyn berdi.
Ǵalym soǵystan keıin Omby aýylsharýashylyq ınstıtýtyn bitirip, ǵylym jolyn tańdaǵan. Qyryq jylǵa jýyq qazirgi Qazaq ulttyq agrarlyq zertteý ýnıversıtetinde jemisti eńbek etti. Otyz jyldan asa ýaqyt osyndaǵy organıkalyq jáne bıologııalyq hımııa kafedrasyn basqaryp, kóptegen shákirt tárbıeledi. Bıohımııa salasynda irgeli zertteýler júrgizip, bıologııa ǵylymdarynyń doktory atandy. Ǵalymdar arasynda qazaq jáne orys tilinde alǵashqylardyń biri bolyp «Bıohımııa» oqýlyǵyn jazdy. Keıin bul oqýlyǵy aǵylshyn tilinde jaryq kórdi. Búginde professor – 150-den asa ǵylymı eńbek pen monografııanyń, 20-dan asa patent pen avtorlyq kýáliktiń avtory.
Ásirese Zulqarnaı Seıitulynyń áriptesterimen birge «Qazaq balzamy» jáne «Altynsý» emdik sýsynyn ázirlegen eńbegin erekshe aıtýǵa bolady. Sondaı-aq álemde alǵash ret óziniń bıologııalyq qasıetin joǵaltpaı, 10 aıǵa deıin saqtalatyn qymyz jáne shubat daıyndaý tehnologııasyn, onyń ishinde qurǵaq qymyz, shubat, bıe jáne túıe sútin alý tásilin oılap tapqan. Osyndaı ǵylymı jańalyqtary úshin ǵalymǵa «Qazaqstannyń eńbek sińirgen ǵylym qaıratkeri» ataǵy berildi. Sonymen qatar táýelsiz «Platınaly Tarlan» syılyǵynyń laýreaty boldy.
