Joba 2019 jyly Prezıdent Qasym-Jomart Toqaevtyń tapsyrmasymen qolǵa alynǵan. Ǵımaratqa qarap kópjyldyq eńbektiń, zamanaýı ınjenerlik, medısınalyq sheshimderdiń sátti úlgisin baıqaý qıyn emes. Nysannyń jalpy aýmaǵy – 60 myń sharshy metr. 210 tósektik orynǵa shaqtalǵan. Budan bólek ortalyqtyń emhanasynda kúnine 500 naýqasty emin-erkin qabyldaýǵa múmkindik bar. Ortalyqqa medısınalyq jabdyqtardy «Varian Medical Systems Inc.», «Philips», «Siemens» syndy álemniń jetekshi óndirýshileri jetkizgen. Osylaısha, Ortalyq Azııada alǵash ret sáýlelik, radıonýklıdtik, protondyq terapııany biriktiretin birtutas platforma qurylyp otyr.
Ortalyqtyń ashylý saltanatyna oraı «Qazaqstan Respýblıkasyndaǵy onkologııalyq kómektiń jańa belesteri. UǴOO – bolashaqtyń ozyq tehnologııalary» taqyrybynda halyqaralyq ǵylymı-tájirıbelik konferensııa ótti. Oǵan 29 elden jetekshi onkologter, zertteýshiler men salanyń bilikti mamandary qatysyp, onkologııalyq aýrýlardy dıagnostıkalaý, emdeý, aldyn alý baǵyttaryndaǵy zamanaýı tásilderdi talqylady. Konferensııada Prezıdenttiń kómekshisi Tamara Dúısenova onkologııalyq aýrýlardy emdeýge el dárigerleri ǵana emes, halyqaralyq qoǵamdastyq qulshynyp otyrǵanyn alǵa tartty.
«Onkologııalyq aýrýlar densaýlyq saqtaý salasynyń basymdyq beretin baǵyttarynyń biri bolyp qala beredi. Sebebi bul – bir óńirdi, bir memleketti ǵana emes, dúnıejúzi halyqtaryn alańdatyp otyrǵan másele. Dúnıejúzinde jylyna 19 mıllıonnan astam qaterli isik jaǵdaıy tirkeledi. Onyń ishinde 10 mıllıonnan astam adam qaıtys bolady. Elimizde búginde 40 myńǵa jýyq pasıentten qaterli isik anyqtalǵan. Qarap otyrsaq, bir monoqalanyń halqy. Onyń ishinde 12 myńnan astam adam qaıtys bolady eken. Muny da salystyrmaly túrde bir aýyldyń halqy dep aıtsaq bolady. Osyny eskersek, álem halyqtary onkologııalyq aýrýlardyń profılaktıkasyn, dıagnostıkasyn jetildirip, aýrýdy emdep-jazý jóninde tájirıbe almasyp otyrýy kerek. Búgingi konferensııa – saladaǵy úzdik tájirıbelerdi, jańashyldyqty talqylaýdyń taptyrmas múmkindik», dedi T.Dúısenova.
Bıologııa ǵylymdarynyń doktory, professor Kúnsulý Zakarııa onkologııalyq aýrýlardy emdeýdi túp-tamyrynan, profılaktıka, dıagnostıkadan bastaý keregin aıtty.
«Onkologııalyq ortalyq – qarapaıym medısınalyq mekeme ǵana emes, elimizdiń densaýlyq saqtaý salasymen qatar, ǵylymnyń damýyna jol ashatyn ortalyq. Jańa ǵımarattyń paıdalanýǵa berilýi – kópjyldyq eńbektiń, saladaǵy dárigerler jetistiginiń nátıjesi. Biz qazir onkologııalyq aýrýlar kúrdelenip bara jatqan kezeńde ómir súrip jatyrmyz. Osyny eskersek, aýrýdy emdeýge kelgende profılaktıka, dıagnostıkaǵa ǵylymı dáleldengen qadammen barý kerek. Onkologııalyq aýrýdy emdep qana qoımaı, onkologııalyq ǵylymdy tereń zerttep, túsinýimiz kerek. Jańa ortalyqtyń mıssııasy da joǵary ǵylymdy, ınnovasııa men ozyq tájirıbelerdi qaterli isikpen kúreste qoldanýǵa baǵyttalady. Munda elimizdiń eń úzdik degen mamandary jumys isteıdi. Aýrýdy dıagnostıkalaý men emdeýdiń jańa tásilderi engiziledi. Bastysy, osy ortalyqta pasıentterdiń, olardyń otbasy músheleriniń úmiti oıanady», deıdi Kúnsulý Zakarııa.
Konferensııadan keıin Ulttyq ǵylymı onkologııa ortalyǵy basqarma tóraǵasynyń medısınalyq qyzmet jónindegi orynbasary Ádilbek Muqajanovpen az-kem pikirlesýdiń sáti tústi.
«Jańa ǵımarat onkologııalyq aýrýlardy dıagnostıkalaýda, emdeýde qoldanylatyn eń ozyq úlgidegi tehnologııalarmen jaraqtandyrylǵan. Munda pasıentter elimizdiń barlyq aımaǵyndaǵy onkologııalyq ortalyqtar men jergilikti aýrýhanalardan joldamamen kelip, tegin em alady. 2019 jyly jańa ǵımarattyń qurylysy bastalǵan sátten biz de qol qýsyryp qarap otyrmaı, maman daıarlaý isine basymdyq berdik. Injener, medısınalyq fızıkter, hımıkter, dıagnostıka jasaıtyn mamandar syndy qyzmetkerlerimiz Japonııa, Ońtústik Koreıa, Úndistan, Izraıl, Túrkııa, AQSh, Germanııa, Ispanııa elderinde tájirıbe jınady. Endi jylyna osy ortalyqtan 10 myńǵa jýyq pasıent stasıonarlyq kómek alady dep josparlap otyrmyz. Shamamen 6 myńnan astam operasııa jasalady, 3 myńnan astam adam sáýlelik em alady. Em-sharalarda jasandy ıntellektiniń kómegin paıdalana bastaımyz. Naqtylap aıtsam, sáýlelik terapııa jasaıtyn «Ethos» degen apparatta osy tásil qoldanylady. Munda jasandy ıntellekt sáýlelik emniń teris áserin azaıtýǵa kómektesedi», dedi Ádilbek Qaıyrbekuly.
Ortalyqtaǵy negizgi tehnologııalar qatarynda «Varian ProBeam» negizindegi protondyq terapııa, PET/KT, PET/MRT syndy qaterli isikti emdeıtin, dıagnostıka jasaýda taptyrmaıtyn sońǵy úlgidegi ozyq quraldar bar. Jańa ǵımaratta halyqaralyq qaýipsizdik standarttaryna saı aýa tazartý, radıoaktıvti qaldyqtardy joıý júıelerimen jabdyqtalǵan 8 mamandandyrylǵan palatasy bar radıonýklıdti terapııa bólimi bolady. Sonymen qatar radıofarmasevtıkalyq preparattardy óndirýge arnalǵan sıklotrondyq-óndiristik keshen iske qosylǵan. Josparǵa sáıkes 11 túrli preparat shyǵarylady, onyń jeteýi elimizde alǵash ret sıntezdeledi. Osy ıgilikterden keıin zamanaýı ınfraqurylymy bar Ulttyq ǵylymı onkologııa ortalyǵy Ortalyq Azııadaǵy jetekshi klınıkalyq, ǵylymı, akademııalyq ortalyqqa aınalýdy maqsat etip otyr.
