Sýretti RWS KZ kompanııasy usyndy
Eki zaýyt salynady
Kompanııaǵa qarasty birneshe zaýyt bar. Olar temirjol vagonynyń dóńgelek juptary men bilikterin, baǵyttamalyq burma, aıqastyrǵysh, jóndeý jıyntyǵyn, relsti bekitkish pen basqa kóptegen buıym óndiredi.
Jaqyn jyldary holdıng eki birdeı metallýrgııalyq zaýyt salmaq. Alǵashqysy – baǵyttama burmasy, platforma men ashyq vagondar úshin kómirtekti jáne joǵary marganesti bolat quımalaryn shyǵaratyn quıý sehynyń qurylysy. Jylyna 20 myń tonna quıma shyǵaratyn óndiris orny keler jyldyń qyrkúıek aıynda ashylýǵa tıis.
Ekinshi aýqymdy joba – qurylysy 3 jylǵa sozylatyn elektrmetallýrgııalyq zaýyt. Jylyna 1 mln tonna bolat quıma ázirleıtin bolashaq zaýyttyń kapsýlasyn salý rásimine О́nerkásip jáne qurylys mınıstri Ersaıyn Naǵaspaev, Pavlodar oblysynyń ákimi Asaıyn Baıhanov, «RWS KZ» kompanııasynyń basqarma tóraǵasy Sergeı Pavlınger qatysty. Mınıstrdiń sózinshe, ınvestısııa kólemi shamamen 500 mlrd teńgeni quraıtyn jobany iske qosý nátıjesinde bolat óndirisi jolǵa qoıylyp, myńdaǵan jumys orny ashylady.
Importqa táýeldilik tómendeıdi
«Otandyq temirjol salasy úshin qajetti bólshek pen buıymdardy buǵan deıin shetelden satyp alyp keldik. «RWS KZ» holdınginiń jańa ónimderi ımportqa táýeldilikten qutqaryp, jergilikti naryqty sapaly buıymdarmen qamtamasyz etpek. Zaýyttar munymen toqtap qalmaýy kerek, óndiristik tehnologııalardy odan ári arttyryp, salany damytýdy jalǵastyra berýi kerek. Úkimet tarapynan mundaı paıdaly ári tıimdi jobalarǵa qoldaý únemi bolady», dedi mınıstr.
Elektrmetallýrgııalyq zaýyt holdıngtiń barlyq kásiporynyn metall ónimderimen qamtamasyz ete alady jáne otandyq tutas taptamaly dóńgelekter men temirjol relsterin óndirýshilerdiń qajettiligin qanaǵattandyrady. Budan bólek, joǵary tehnologııalyq metallýrgııalyq ónimniń 40%-y TMD jáne Eýroodaq elderine eksporttalmaq. Kásiporynda qazirgi zamanǵy tehnologııalar paıdalanylady. Nátıjesinde, kompanııa balqytý, tazartý jáne qospalaý úderisin álemdik kórsetkishtermen salystyrǵanda 20%-ǵa deıin, al elimizdegi ózge óndiristermen salystyrǵanda 50%-ǵa deıin jedeldetýdi josparlap otyr. Ári energııa resýrstaryn tutynýdy kem degende 50%-ǵa tómendete alady. Qosymsha ılemdeý jyldamdyǵyn 30%-ǵa deıin arttyrý úshin ılemdeý óndirisinde ınnovasııalardy, sondaı-aq aralas óndiristi engizý oılastyrylǵan.
Bul kúni ustalyq-bandajdaý kesheniniń alǵashqy kezegi de iske qosyldy. Ustalyq-bandajdaý kesheni – otandyq temirjol salasyn lokomotıvterge arnalǵan bandaj, tisti dóńgelek ázirlemesi, lokomotıv jáne vagon bilikteri, ılemdelgen dóńgelek shentemirlerimen tolyqtaı qamtamasyz etýge múmkindik beretin óndiris. Jıyntyq qýaty – jylyna 160 900 birlik ónim. О́nim halyqaralyq standarttarǵa sáıkes keledi jáne ımportqa táýeldilikti tómendetedi. О́nimniń 70%-dan astamy sheteldik tapsyrys berýshilerge baǵdarlanbaq. Bul elimiz úshin halyqaralyq arenada eksporttaýshy pozısııasyn nyǵaıtýǵa jaǵdaı jasaıdy.
Qaldyq azaıyp, múmkindik kóbeıedi
«Memleket basshysy Ekibastuzda bolǵanda tolyq sıkldi tehnologııamen jabdyqtalǵan, sapaly ónim shyǵaratyn tik ıntegrasııalyq kásiporyndar qurý týraly tapsyrma berdi. Jańa kásiporynnyń iske qosylýyn Prezıdenttiń tapsyrmasyn oryndaýdaǵy mańyzdy qadam dep bilemiz. Bul ónerkásiptik, ekonomıkalyq jáne temirjol qaýipsizdigin qamtamasyz etýge yqpal etedi. Biz holdıng pen temirjol ındýstrııasyn óz shıkizatymyzben qamtımyz. Elimizdegi qolaıly ınvestısııalyq ahýal otanymyzdy damytýǵa jáne ındýstrııalandyrýǵa úles qosýymyzǵa múmkindik berip jatyr», deıdi Sergeı Pavlınger.
Kásiporyn 4:0 ındýstrııasy standarttary boıynsha jabdyqtalǵan. О́ndiristik úderiste robottandyrylǵan avtomatty jeli jumys isteıdi. Jabdyqtyń qazirgi zamanǵy modelderi sıfrlyq baǵdarlamalyq basqarý júıelerimen jaraqtandyrylǵan. Aýstrııa, Germanııa, Chehııadan ákelingen jabdyqtar joǵary dáldikti qamtamasyz etip, qaldyqtardy barynsha azaıtady. Munyń bári saıyp kelgende óndiris shyǵyndaryn azaıtýǵa múmkindik bermekshi.
«RWS KZ» kompanııasy – Ekibastuzda erekshe damyp kele jatqan, eksportqa baǵyt alǵan iri klaster. Bir ǵana ustalyq-bandajdaý sehy jobasyna 125 mlrd teńge qarjy quıylyp, 600-den astam jumys orny quryldy. Mundaǵy eńbekkerler joǵary jalaqymen qamtylǵan. О́ndiristen shyǵatyn buıymdardyń kemi 85%-y eksportqa jóneltiledi. Aldaǵy 3 jylda bul keshenge 500 mlrd teńgege jýyq ınvestısııa jumsalyp, osy óndiristiń ózi-aq Ekibastuzdy ekonomıkasy jan-jaqty damyǵan qala retinde kórsete alady degen senimdemiz. Joba nátıjesinde óńir bıýdjetine túsetin salyq 9 mlrd teńgege ulǵaıady. Ol qarjyny Ekibastuzdaǵy ınjenerlik jelilerdi jaqsartýǵa jáne shahardy kóriktendirýge baǵyttaımyz», dedi óńir basshysy Asaıyn Baıhanov.
Holdıng sońǵy 10 jylda óz qarjysy esebinen Ekibastuz ekonomıkasyna 700 mlrd teńge ınvestısııa quıǵan. Kásiporyn sehtarynda búginde 3 myńdaı adam eńbek etse, qurylysy bastalǵan jobalar tolyq qýatyna engende qosymsha 2 myń adam «eki qolǵa bir kúrek» tabady. Kompanııa jylyna 300 myń taptamaly temirjol dóńgelegin, 20 myń dóńgelek juby men 42 myń bilik, 1 mln dana relsti bekitkishter óndirip otyr.
Pavlodar oblysy,
Ekibastuz qalasy
