«Ashyq esik kúni» jastardyń áskerı qyzmetke degen qyzyǵýshylyǵyn arttyrýǵa baǵyttalǵan. Oqýshylar áskerı bólimdegi sarbazdardyń ómirin tamashalaý arqyly patrıottyq tálim-tárbıe aldy, áskerı qyzmetshilerdiń kúndelikti tirshiligin bireý arqyly estimeı nemese ınternetten kórmeı ózderi shynaıy kózben kórip, baǵalap qaıtty. Áskerdegi jaǵdaıdy tanystyryp, ekskýrsııa jasatýdy bólim basshylyǵy qolǵa aldy. Olar jas qonaqtardy birge ertip júrip jaýyngerdiń ómiri men qyzmetiniń qalaı ótip jatqanyn tamashalatty.
Al ekskýrsııa barysynda oqýshylar birinshi kezekte áskerı bólimniń kúzeti men ishki qaýipsizdigin qamtamasyz etýde sheshýshi ról atqaratyn qaraýyl qalashyǵymen tanysty. Bólim basshylyǵy qonaqtarǵa qaraýyl qyzmetiniń qurylymy men mindetteri týraly egjeı-tegjeıli aıtyp berdi. Sondaı-aq kún tártibiniń erekshelikterin, kúzet qyzmetiniń ereje-zańdaryn, kezekshilikti qabyldaý men tapsyrýdyń tártipterin túsindirdi. Oqýshylar qaraýyl qyzmetin atqaratyn jeke quramǵa arnalǵan úı-jaılardyń qalaı jabdyqtalatynyn, jeke qorǵanys quraldary men qarý-jaraq saqtaýdyń qaǵıda-tásilderin jaqynnan kórip bildi. Mektep oqýshylary nysandardyń kúzet rejimi qalaı baqylanatynyn, qaraýyldar men kezekshiler arasyndaǵy ózara is-qımyl qalaı uıymdastyrylatynyn ańǵardy.
О́z kezeginde merzimdi qyzmettiń áskerı qyzmetshileri ornalasqan kazarmalyq úı-jaılar kelgen qonaqtardyń erekshe qyzyǵýshylyǵyn týdyrdy. Aralaý barysynda oqýshylar jatyn oryndardaǵy tártipke, úı-jaılardyń sanıtarlyq jaǵdaıyna, ishki tártip talaptarynyń saqtalýyna zer sala qarady. Ekskýrsııa kezinde bólim basshylyǵy armııa standarttary boıynsha kereýetti qalaı durys salý kerektigin kórsetti, ár áskerı qyzmetshiniń jeke aımaǵynda kúndelikti tazalyq pen uqyptylyqty saqtaýdyń mańyzdylyǵyn da oqýshylarǵa uǵyndyrdy.
Sondaı-aq áskerı bólimniń saptyq alańynda mektep tárbıelenýshilerine arnalǵan kórme uıymdastyryldy. Onda ártúrli qarý-jaraq túrleri men áskerı kıim úlgileri kelýshiler nazaryna usynyldy. Ofıserler men serjanttar qarý-jaraqtyń sıpattamalary, ony paıdalaný erejeleri men qoldaný kezindegi qaýipsizdik sharalary týraly egjeı-tegjeıli baıandap berdi. Oqýshylar nysandy kıim úlgilerin, onyń ishinde arnaıy jabdyqtardy kórýge erekshe yqylas tanytty. Kórme aıaqtalǵannan keıin qonaqtarǵa jeke radıasııalyq, hımııalyq jáne bıologııalyq qorǵanys quraldaryn qalaı durys paıdalaný kerektigin sarbazdar tájirıbe júzinde kıip kórsetti. Áskerıler mundaı qorǵanys kıimderin qoldanýdyń mańyzyn túsindirip ótti. Jalpy, bólim basshylyǵy áskerde tártip pen jaýyngerlik daıyndyq qatań bolý kerektigin eskertti. О́ıtkeni jaýyngerdiń maqsat-mindeti eldi qorǵaý bolsa, ol oǵan árdaıym daıyn júrýi kerek.
– Búgin men áskerı qyzmet týraly kóp nárse bildim. Otan qorǵaýshylardyń qalaı ómir súrip jatqanyn kózben kór-dim, áskerı bólimniń tynys-tirshiligimen jaqynnan tanystym. Bul maǵan qatty unady, umytylmas erekshe áser syılady. Rasymen, áskerı azamattardyń qyzmetin shynaıy túrde tamashalaý óte qyzyq eken. «Júz ret estigennen bir ret kórgen artyq» dep jatady ǵoı. Meni búgingi is-shara aıryqshy shabyttandyrdy. Áskerı qyzmetshi bolmasam da Otan aldyndaǵy boryshymdy ótep, jaýyngerlik adal mindetimdi atqarǵym keldi. Jáne áskerı qyzmetshiniń jumysy qanshalyqty jaýapty ári mańyzdy ekenin osy is-shara arqyly jaqsy túsindim. Eldiń tynyshtyǵyn kúzetken sarbazdar aman bolsa eken. Qazaqstanda árdaıym beıbitshilik ornap tynyshtyq saqtalsyn. Jalpy, álemde soǵys degen bolmaı, birde-bir oq atylmasa eken dep tileımin, – dedi ekskýrsııadan alǵan áseri jóninde oı bólisken qalalyq №106 mekteptiń oqýshysy Nurdáýlet Ájimahan.
Sonymen, oqýshylarǵa erekshe kóńil kúı syılaǵan «Ashyq esik kúni» is-sharasy sarbazdar ashanasynda túıindeldi. Onda qonaqtarǵa áskerı qyzmetshilerdiń tamaqtaný mázirine qandaı as túrleri kiretini, as pisirýge nendeı ónimder jıi paıdalanatyny, sondaı-aq tamaq ázirleýdegi normalar men erejeler týraly jan-jaqty baıandaldy.
ShYMKENT
