Foto: Ashyq derekkóz
Mınıstrliktiń málimetinshe, jańa qoldaý tetikteriniń birinshisi – quny 7 mıllıard teńgeden asatyn iri jobalarǵa arnalǵan. Bul qural arqyly ónerkásip, energetıka, ınfraqurylym jáne eksport syndy ekonomıkanyń mańyzdy salalaryndaǵy jobalar qarjylandyrylady. Memleket bankter úshin táýekeldi azaıtý maqsatynda nesıege kepildik beredi. Sonyń arqasynda bıznes ókilderi qarjyny ońaı alyp, jobalaryn júzege asyra alady.
Ekinshi tetik shaǵyn jáne orta kásipkerlik sýbektilerin qoldaýǵa baǵyttalǵan. Quny 7 mıllıard teńgege deıingi jobalardy qamtıdy. Kásipkerler kepildiksiz qarjylandyrý múmkindigine ıe. Qazirgi ýaqytta bes bankpen kelisim jasalǵan: Bank SentrKredıt, Halyk Bank, Freedom Bank, Fortebank jáne Bank RBK. Taǵy eki bankpen kelissózder júrgizilýde. Seriktes bankter tizimi aldaǵy ýaqytta keńeıtiledi.
«Baǵdarlamanyń alǵashqy nátıjesi de belgili. Jalpy somasy 3,3 mlrd teńgege 34 joba qoldaý tapqan. Kepildik berý rásimi jeńildetilip, eki jumys kúni ishinde oryndalady. Muny alýshy – óndiris, kólik, bilim berý sekildi túrli sala ókili. 2025 jyldyń sońyna deıin 10 myń joba qoldaý tappaq. 2028 jylǵa qaraı kepildik portfeliniń kólemi 1,4 trln teńgege jetkiziledi. Osylaısha, jyl saıyn bıznestiń 50 myńnan astam bastamasyna qoldaý kórsetiledi», dep habarlady mınıstrliktiń baspasóz qyzmeti.
«Damý» qorynyń búgingi tańdaǵy seriktesteri qatarynda Bank SentrKredıt, Halyk Bank, Freedom Bank, Fortebank, Bank RBK, Bereke Bank jáne Qazaqstan–Zıraat Interneshnl Bank bar. Qor tarapynan kásipker alǵan nesıe somasynyń 85%-yna deıin kepildik beriledi. Bul bankter úshin de, kásipkerler úshin de nesıe rásimin qoljetimdi ári tıimdi etedi.
Habarlanǵandaı, usynylǵan jańa qarjy quraldary bankterdiń táýekelin azaıtyp, qarjylyq ınfraqurylymdy damytýǵa jol ashady. Bul óz kezeginde otandyq bıznestiń ósý áleýetin arttyryp, ekonomıkalyq damýǵa serpin beredi.
Aıta keteıik, jańa bastamalar ekonomıkalyq ósimdi jedeldetý sharalary aıasynda júzege asyrylyp otyr. Buǵan deıin 2025 jyly «Báıterek» holdınginiń jarǵylyq kapıtalyn 1 trıllıon teńgege ulǵaıtý josparlanǵany habarlanǵan bolatyn. Bul qadam 8 trıllıon teńgege deıingi ınvestısııany jańa jobalardy iske qosýǵa, óndiristik qýatty arttyrýǵa jáne joǵary ónimdi jumys oryndaryn qurýǵa baǵyttaýǵa múmkindik beredi.
