Jınaqta Keńes Odaǵynyń batyrlary Baýyrjan Momyshuly, Málik Ǵabdýllın, Álııa Moldaǵulova jáne maıdanger-jazýshy Ázilhan Nurshaıyqovpen birge esimderi beımálim 130 qazaq jaýyngeriniń maıdannan jazǵan hattary toptastyrylǵan. Sonymen qatar Memleket basshysy Qasym-Jomart Toqaevtyń óz ákesiniń soǵystan oralmaǵan týǵan aǵasy Qasym týraly esteligi berilgen.
Mundaǵy hattardyń deni – Ulttyq ǵylym akademııasynyń Sırek kitaptar men qoljazbalar qorynan alynǵan. Kitaptyń jalpy redaksııasyn ýnıversıtet rektory, akademık Erlan Sydyqov basqarǵan. Mazmundy is-shara barysynda ol atalǵan jınaqty osy oqý orny ǵalymdary daıyndaǵanyn erekshe atap ótti.
«Kitapqa maıdannan jazylǵan hattar jınaqtaldy. Onyń ishinde buryn esh jerde jarııalanbaǵan hattar bar. Biz osy jumysty odan ári jalǵastyramyz. О́ıtkeni áli kúnge deıin kóptegen qazaq otbasynda jaqyndarynyń soǵystan jazǵan hattary saqtalǵan. Shyndyǵynda, myńdaǵan hat áli jaryq kórmeı jatyr. Bir jaǵynan, qandy qyrǵynnyń qasiretin uǵynýǵa muraǵat dúnıeleri azdyq etedi. Soǵys sumdyǵyn sol ottyń ortasynda júrgen jaýyngerlerdiń eldegi týǵan-týysqandaryna jazǵan hattary da ashyp bere alady. Osylaı biz jas urpaqqa soǵystyń qatygez beınesin túsindirip, beıbitshiliktiń qunyn bile alamyz», dedi E.Sydyqov.
Jınaqtaǵy hattar jaqsy suryptalǵan. Munda qazaq jaýyngerleriniń móldiretip jazǵan kóńil syrlary men sol aýyr kezeńdegi kórinister shynaıy aıshyqtalǵan.
Tanystyrylymda sóz alǵan memleket jáne qoǵam qaıratkeri Qýanysh Sultanov jańa jınaqtyń ishi tolǵan taǵdyr men tarıh ekenin jetkizdi.
«Bul kitapty jaıbaraqat oqı almaısyz. Qazirgi jastarǵa soǵystyń zulmaty qandaı ekenin uǵyndyratyn qundy eńbek. Mura jınaý ońaı emes. Maıdanda qurban bolǵan atalarymyzdyń erligi eshqashan umytylmasyn», dedi ol.
Sondaı-aq is-sharada memleket jáne qoǵam qaıratkerleri Saýytbek Abdrahmanov, Darhan Myńbaı, Májilis depýtaty Qazybek Isa, Memlekettik Eltańba avtory Jandarbek Málibekuly, jazýshy Shárbaný Beısenova sóz alyp, baǵaly eńbektiń qundylyǵy týraly parasatty oı qozǵady.
