Osydan 26 jyl buryn ataýly kúnde otbasynyń qýanyshyn eseleı túsken jannyń biri – Jeńis Jolamanuly. Qos merekeni bólip jarmaı qatar toılaý onyń bala kezgi ádeti. Búginde Jeńis Atyraý oblysy TJD qalalyq №13 mamandandyrylǵan órt sóndirý bóliminde bólimshe komandıri qyzmetin atqarady. О́mirdegi jetistikteri, bıik maqsattary atyna tikeleı baılanysty ekenin aıtady keıipkerimiz.
– Mahambet aýdany Saraıshyq aýylynyń týmasymyn. Atam bul esimdi maǵan batyrlyqtyń, tabandylyqtyń, jiger men rýhtyń belgisi retinde amanat etti. Eseıip, er jetken soń onyń mán-mańyzyn tereńinen túsine bastadym. Bul – bir jaǵynan erkindik jolynda janyn qıǵan maıdangerlerge degen máńgilik taǵzymnyń kórinisi. Ekinshiden, atyma saı jaýapkershilik júgi. Sol sebepti qaı salada eńbek etsem de, qaı isti qolǵa alsam da aldyma maqsat qoıyp, tabandylyqpen jetýge tyrysamyn, – dedi J.Jolamanuly.
22 jastaǵy Jeńisgúl Qosannyń da esimi ómirlik ustanymyn aıqyndaǵan. Áýlet bolyp aqyldasyp, marqum atasy Jeńis kúniniń qurmetine «Jeńis», al ómirde gúldeı jaınap júrsin degen nıette «gúl» tirkesin jalǵap, azan shaqyryp qoıǵan.
– Qazaq yrymshyl keledi. Keshegi ótken ata-babalarymyz da sábıge esim berýde júz oılanyp, myń tolǵanyp baryp, bir toqtamǵa kelgen. О́ıtkeni balanyń aty taǵdyryna áser etetin tylsym kúsh dep baǵalaǵan. Sondyqtan dana halyq perzentine qol bastaǵan batyrdyń, sóz bastaǵan sheshenniń, el bastaǵan bıdiń, jez tańdaı, kúmis kómeı ánshi-jyrshylardyń esimin qoıýǵa tyrysady. Al meniń atam rýh pen jigerdiń sımvoly retinde Jeńisgúl dep qoıdy. Tarıhqa kóz júgirtsek, surapyl soǵys adamzattyń júregine óshpes jara salyp, keıingi urpaqqa aýyr sabaq qaldyrdy. Sol sumdyq kezeńde tylda qalǵan halyq, úıdegi áıel, bala-shaǵa da azapty kúnderdi bastan keship, maıdangerlerge qoldaý kórsetý úshin bar kúsh-jigerin jumsady. Mine, sol jyldardyń ótkenine 80 jyl toldy. Osyǵan oraı, Aqmola oblysy, Birjan sal aýdany, Tasshalqar aýylyndaǵy mektepte «Erlikke taǵzym» taqyrybynda oqýshylaryma synyp saǵatyn ótkizdim. Osylaısha ardagerlerimizdiń eren erligin óskeleń urpaqqa keńinen dáriptep, olardyń júregine elge degen súıispenshilik pen patrıottyq rýh oıatýǵa shynaıy yqylaspen atsalystym, – dedi J.Qosan.
Ulttyq statıstıka bıýrosy bergen derekke súıensek, búginde elimizde naqty Jeńis esimimen 3 300 azamat tirkelgen. Al «-nur», «-han», «-ǵalı», «-keldi», «-bek» syndy neshe túrli tirkesteri bar barlyǵy 15 116 adam bar. Sondaı-aq Pobeda degen esimmen 21 adam ómir súrip jatyr.
Halyq qaharmany, aty ańyzǵa aınalǵan bahadúr Baýyrjan Momyshulynyń qurmetine 43 534 otandasymyzǵa Baýyrjan esimi berilgen. Al erligimen el esinde qalǵan Raqymjan atyn 1 078, Qasym atyn 3 938 otandasymyz ıelengen.
Qazaqtyń qaharman qyzdary – Álııa Moldaǵulova men Mánshúk Mámetovanyń esimderi de ult júreginde. Búginde respýblıka aýmaǵynda Álııalardyń sany 66 myńnan asyp jyǵylady. Al Mánshúk atty 1 173 qyz-kelinshek bar. Sol bir otty jyldardan esimi urpaqqa ańyz bop jetkenderdiń qatarynda Málik Ǵabdýllın, Talǵat Bıgeldınov, Hıýaz Dospanova da bar.
