Sýret: pravda.com.ua
Ekinshi dúnıejúzilik soǵystyń aıaqtalǵanyna 80 jyl tolýyna oraı, «Bayer», «Bosch», «Volkswagen», «Lufthansa» jáne taǵy basqa shamamen 50 jetekshi nemis korporasııasy ortaq málimdemege qol qoıyp, 1933 jyly ulttyq-sosıalısterdiń bılikke kelýinde bıznestiń mańyzdy ról atqarǵanyn moıyndady. Bul týraly «Frankfurter Allgemeine Zeitung» basylymy habarlady.
Qujatta 1933 jyly ulttyq-sosıalıstik qozǵalystyń bılikke kelýi – sol ýaqyttaǵy saıası, áskerı, sot jáne ekonomıkalyq qurylymdardaǵy jaýapty tulǵalardyń qatelikteri men áreketsizdiginiń saldary ekeni jazylǵan. Sonymen qatar óz múddesin kózdegen kóptegen kompanııa bul júıeniń qalyptasýyna tikeleı ne janama túrde qoldaý kórsetkeni de atalyp ótedi.
«Búginde biz – Germanııanyń zamanaýı kompanııalary – ótkenniń aýyr sabaqtarynan nátıje shyǵaryp, nasıstik dáýirdiń qylmystaryn umytpaýǵa jáne tarıhı ádiletti saqtaý jolynda jaýapkershilik alýǵa daıynbyz. Biz adam quqyqtary men demokratııalyq qundylyqtardy qorǵaý jolynda birlesip áreket etemiz», delingen ashyq hatta.
Bul málimdemege qol qoıǵandar qatarynda «Adidas», «Hugo Boss», «Rhein-metall», «REWE», «Allianz», «Commerzbank», «Daimler Truck», «Deutsche Börse», «Deutsche Telekom», «Deutsche Bank», «E.ON», «Henkel», «Bayer», «Bosch», «Deutsche Bahn», «BMW», «DHL», «Mercedes-Benz», «Lufthansa», «Volkswagen» jáne taǵy basqa iri korporasııalar bar.
Nasıstik dıktatýra kezinde kóptegen iri nemis kompanııalary Úshinshi reıh basshylyǵymen ashyq áriptestik ornatyp, ońtaıly áskerı kelisimsharttar jasaǵan. Keıin soǵys aıaqtalǵan soń, keı nemis kásipkerleri nasıstik rejimge qoldaý kórsetip, quldyq eńbek kúshin paıdalanǵany, Reıhtiń áskerı qýatyn nyǵaıtýǵa úles qosqany jáne áskerı qylmystarǵa qatysqany úshin trıbýnalda jaýap bergen edi.
