Foto: egemen.kz/ Qyrmyzy Jumaǵalıqyzy
Qazaqstanda meıirgerlerdi 94 medısınalyq kolledj daıarlaıdy, onyń ishinde 22-si – memlekettik, 72-si – jekemenshik. Olardyń 39-y – joǵary medısınalyq kolledj mártebesine ıe.
Búginde elimizdiń densaýlyq saqtaý júıesinde 190 myńnan astam orta býyn medısına qyzmetkeri jumys isteıdi. 146 myńnan astamy – meıirger. Al aýyldyq jerlerde shamamen 55 myń maman ter tógip júr. Olardyń arasynda 33 jyldan beri meıirgerlik mindetin atqaryp júrgen Álııa Týlekova men 8 jyldan beri medısına maıdanynda meıirger atanǵan Baný Tájibaı da bar.
Kásibı merekege oraı júrek qalaýy men balalyq armanyn adam ómirin arashalaýmen ushtastyrǵan mıssııa ıeleriniń jumys mazmunymen tanystyq.
Álııa Týlekova búginde Astana qalalyq №8 emhanada qyzmet etedi. Álııaǵa júktelgen 42-aımaqta 1793 adam tirkelgen. Ol kún saıyn ondaǵan tirkelýshiniń medısınalyq derekterimen jumys istep, josparly shaqyrtý, sala mamandaryna joldama berý syndy isterdi atqarady.
«Bizdiń aımaqta tirkelgen halyq sany kóp. Soǵan saı atqarylar sharýa da arta túsedi. Qazir medısına salasy sıfrlanyp, jetilip jatyr. Dese de meıirgerler júktemesi jetkilikti. Máselen, dárigerdiń kelýshilerdi qabyldaýyna 5 saǵat berilse, sol ýaqytta 15 adam bizdiń aldymyzdan da ótedi. Bul kórsetkishten tys aýyryp shuǵyl medısınalyq kómekke muqtajdar men josparly ekpe alýshylar da bar. Sonymen qatar ota merzimi belgili naýqastardyń aldyn ala analızderi men maman keńesin alý syndy jumystaryn úılestiremiz», degen meıirger emhanada qabyldaýdan bólek jańa týǵan náresteler men medısına mekemesine jetýi qıyn soǵatyn naýqastardyń úıine dárigermen birge kómekke jetedi.
«Kúndelikti emhanada kelýshilerdi 5 saǵat qabyldaımyz. Odan bólek josparly túrde aımaǵymyzdaǵy úılerdi aralap, kásibı keńes berip, em-dom júrgizemiz. Men 1989 – 1992 jyldar aralyǵynda Selınograd temir jol medısına ýchılıshesinde bilim aldym. Sol jyldary, shynynda da ómirimdi osy salamen baılanystyratynymdy jete túsingem. Sondyqtan kúndelikti jumys barysyndaǵy qıyndyqtar - men úshin eńbegimniń bir bólshegi. Basty nazarymdy kedergilerge emes, jumysym beretin múmkindikterge qoıamyn», deıdi Álııa Aqjanqyzy.
Kelesi keıipkerimiz Baný Tájibaı Almaty qalasyndaǵy №2 balalar aýrýhanasyndaǵy qabyldaý bóliminde qyzmet atqarady. Baný kásibı mindetiniń aıasynda kúnine shamamen 300-400 balanyń saýyǵýyna áriptesterimen birge kúsh biriktiredi. Bala armany jetelegen mamandyǵyna mahabaty da aıryqsha.
«Ár medısına mekemesiniń qabyldaý bólimi tynymsyz tirshilik etedi. Men qyzmet atqaratyn №2 balalar aýrýhanasy elimizdegi iri almaly shahar balalarynyń amandyǵy jolynda eńbektenedi. Sondyqtan medısınalyq kómekke qol sozýshylar da kóp. Eskeretini, bizdiń aýrýhanaǵa balalar pnevmonııa, travmotologııalyq, kardıologııalyq, allergııalyq aýrýlarman qatar, qant dıabeti, vırýstyq aýrýlarmen de júginip jatady. Qabyldaý bólimi naýqastarǵa alǵashqy kómek kórsetedi. Dárigerlerdiń taǵaıyndaýymen em-sharany jalǵastyramyz. Naýqastardyń aıaqtan turýy ári qaraıǵy tynysy osy qabaldaý bóliminiń jedel kómegine baılanysty bolǵandyqtan barlyq jaǵdaıǵa der kezinde den qoıamyz. Máselen, demikpemen túsken balany dereý kıslorod apparatyna qossaq, allergııa boıynsha kelgen kishkentaı naýqasqa ıneksııany jedel salamyz. Qajetti analızderdi alamyz. Kúndelikti kelýshilerdiń 70-80-i aýrýhanaǵa jatqyzylady. Osydan-aq, qabyldaý bóliminiń qanshalyqty qıyn jaǵdaıdaǵy balalardyń ońalýyna úles qosatynyn ańǵarýǵa bolady», deıdi meıirger maman. Ol aýrýhanadaǵy táýliktik kezekshilikke túsken kezderde jumystyń qarbalasymen ýaqyttyń qalaı ótkenin baıqamaı qalatynyn da atap ótti.
«Kezekshiligimiz kún-túnge bólinbeıdi. Sondyqtan bir kúndik jumys ýaqytymyz – 24 saǵat. Júrekpen tańdalǵan jumystyń aýyrlyǵy sezilmeıdi. Bizdiń basty tilegimiz balalardyń amandyǵy, aýrýhanadan taı-qulyndaı oınap, saý shyǵýy», dedi Baný Tájibaı.
Qazaqstan halqynyń saýlyǵy kúndelikti osy salada ter tógetin meıirger mamandardyń qolynda. Sondyqtan sala mınıstrligi meıirgerler mártebesi men qyzmetin júıelýge nazar aýdaryp keledi. Densaýlyq saqtaý mınıstrligi keıingi jyldary elimizdiń densaýlyq saqtaý júıesinde meıirgerlerdiń róli edáýir artqanyna nazarymyzdy aýdardy. Qyzmet aıasyn keńeıtý jáne ókilettikterdi berý arqyly meıirgerler medısınalyq kómekti komandalyq úlgide kórsetý júıesiniń ajyramas bóligine aınalǵan.
Bul óz kezeginde dárigerlerdiń júktemesin azaıtyp, pasıentter aǵynyn tıimdi úılestirýge, sondaı-aq medısınalyq qyzmetterdiń qoljetimdiligi men sapasyn arttyrýǵa tyń múmkindik bergen.
