Foto: Ashyq derekkóz
Qylmystyq isti Mańǵystaý oblysy boıynsha QMA departamenti júrgizgen. Tergeý barysynda belgili bolǵandaı, «IntererStroıAktaý» JShS basshylary qurylys júrgizýge lısenzııasy, ruqsaty men jobalyq-smetalyq qujattamasy bolmaǵanyna qaramastan, úlestik qatysý negizinde 590 shart jasasqan.
Sonyń nátıjesinde úleskerlerden zańsyz túrde 5,5 mıllıard teńgeden astam qarajat tartylǵan. Qurylys jumystary talapqa saı júrgizilmegen ári merziminde aıaqtalmaǵan.
«1,9 mlrd teńge kólemindegi qarajatty jalǵan qurylys aktileri arqyly qolma-qol aqsha retinde kassadan shyǵaryp, kompanııa basshylyǵy qaltasyna basqan. Tergeý barysynda 5 jer telimi men 47 avtokólikke tyıym salyndy. Sot úkimimen kompanııa basshylary 3,5 jyldan 6,5 jylǵa deıin bas bostandyǵynan aıyryldy», delingen habarlamada.
Sondaı-aq, 1,1 mıllıard teńge kólemindegi múlik zardap shekken azamattardyń azamattyq talap-aryzdaryn óteý úshin memleket paıdasyna tárkilengen.
Aıta keteıik, buǵan deıin QMA Almaty oblysy boıynsha departamenti Qaskeleń qalasyndaǵy kópqabatty turǵyn úıler qurylysyna qatysty asa iri kólemdegi alaıaqtyq deregi boıynsha tergeýdi aıaqtaǵan bolatyn.
