Foto: QR DSM
Forýmda shuǵyl medısınalyq kómekti uıymdastyrý, zamanaýı tehnologııalardy engizý, jáne emdeýge jatqyzýǵa deıingi kezeńde kómek kórsetýdiń tıimdiligin arttyrý máseleleri talqylanady.
QR Densaýlyq saqtaý vıse-mınıstri Tımýr Mýratov konferensııanyń ashylýynda Qazaqstanda shuǵyl medısınalyq kómekti damytý boıynsha júrgizilip jatqan reformalar týraly aıtty.
«Qazaqstan – aýmaǵy keń, halqy árkelki qonystanǵan el, bul shuǵyl medısınalyq kómekti kórsetýge erekshe jaǵdaı týǵyzady. Biz zamanaýı logıstıkalyq modelderdi, telemedısına sheshimderin engizip, mamandardyń biliktiligin arttyrý baǵytynda belsendi jumys istep jatyrmyz. Eń mańyzdy basymdyqtardyń biri – qoljetimsiz óńirlerden pasıentterdi der kezinde evakýasııalaýǵa múmkindik beretin medısınalyq avıasııany damytý bolyp tabylady», dedi Tımýr Mýratov.
Paneldik sessııalarda ózbekstandyq áriptester shuǵyl medısınalyq kómek júıesinde aýdanaralyq ortalyqtardyń jumysyn uıymdastyrý tájirıbesimen bólisti, sondaı-aq Qazaqstannyń túrli aımaqtarynan jedel medısınalyq kómektiń ózekti máseleleri qaraldy. Reseı Federasııasynan kelgen sarapshy júrek-ókpe reanımasııasy men reanımasııalyq is-sharalardyń zamanaýı tehnologııalaryn tanystyrdy, al Soltústik Qazaqstan oblysynyń ókilderi beınetirkegish qurylǵylaryn paıdalaný tájirıbesin ortaǵa saldy.
Konferensııada sanıtarııalyq avıasııany damytý, shuǵyl medısınalyq qyzmet mamandarynyń quqyqtyq rettelýi jáne reanımasııalyq is-sharalarǵa ınnovasııalyq kózqarastarǵa erekshe nazar aýdaryldy.
«Shuǵyl medısınalyq kómekti damytý – densaýlyq saqtaý salasyndaǵy memlekettik saıasattyń basym baǵyttarynyń biri. Biz halyqaralyq yntymaqtastyqqa, zamanaýı tehnologııalardy engizýge, kadr daıarlaýdy jetildirýge jáne árbir azamat úshin shuǵyl kómektiń sapasy men qoljetimdiligin arttyrýǵa múddelimiz. Konferensııa nátıjeleri Qazaqstandaǵy jedel medısınalyq kómek júıesin odan ári nyǵaıtýǵa negiz bolady dep senemin», dedi vıse-mınıstr.
