Oblys ákimdiginiń málimdeýinshe, quqyq qorǵaý organdarynyń ókilderi qatysýymen jumys toby qurylǵan. Endi óńirde zań talaptaryna saı emes salynǵan qurylystar men zamattardyń qarjysyn turǵyn úı qurylysyna zańsyz tartqan qurylys kompanııalarynyń jumystary baqylaýǵa alynatyn boldy.
Abaı oblysy boıynsha memlekettik sáýlet-qurylys baqylaý basqarmasy basshysynyń mindetin atqarýshy Saılaý Baınazarovtyń málimdeýinshe, Semeı qalasyndaǵy Selevın kóshesi 12 b meken-jaıynda ornalasqan ortalyq úleskerlerge zańdyq turǵydan kómek kórsetedi.
«Munda úleskerler ózderiniń kelisimsharttaryn ákelip, tirkeýge bolady. Ol tirkeý ne úshin kerek? Árbir úleskerdiń máselesin jeke-jeke qarastyrý úshin qajet. Eger bizdiń qolymyzda kelisimsharttardyń qujattary bolmasa, azamattardyń turǵyn úıge qarjysyn salǵan-salmaǵanyn dáleldeıtin fıskaldy túbirtekteri bolmasa qalaı qarastyramyz? Turǵyndar kelisimsharttaryn ortalyqqa tirkegen kezde zańdy turǵyda qaraı alamyz», dedi basqarma ókili.
Resmı málimetke sáıkes, 2022-2024 jyldary Semeı qalasynda ondaǵan kóp qabatty úı ruqsatsyz salynǵan. Bul turǵyn úılerge qazirgi kezde 547 úleskerdiń óz qarjylaryn salǵany anyqtaldy.
Saılaý Baınazarovtyń aıtýynsha, úleskerlerdiń eshqaısysy nazardan tys qalmaıdy. Bul máseleni oblys ákimi jeke baqylaýynda ustap otyr. Ákimdik pen basqarma ókilderi úleskerlermen jeke-jeke jumys júrgizip, ashyq dıalog qurýǵa daıyn.
