Foto: Aqorda
Memleket basshysyna «Samuryq-Qazyna» tobynyń 2024 jyly taza tabysy 39 paıyzǵa, operasııalyq tabysy 9 paıyzǵa óskeni týraly málimet berildi.
Prezıdentke usynylǵan aqparatqa sáıkes, byltyr 4 iri ınfraqurylymdyq joba aıaqtalǵan. Atap aıtqanda, Ekibastuzdaǵy birinshi Memlekettik aımaqtyq elektr stansasynyń №1 energoblogy qalpyna keltirildi, Sıan qalasynda kólik-logıstıka termınaly jumys isteı bastady, Almatynyń energetıka keshenine qajetti gaz ınfraqurylymynyń qurylysy aıaqtaldy, Qarashyǵanaq ken ornynda gazdy keri aıdaýǵa arnalǵan besinshi kompressor paıdalanýǵa berildi.
Nurlan Jaqypov bıyl mamyr aıynda bıtým óndirisin keńeıtý jobasy bastalǵanyn jetkizdi. Jyl sońyna deıin taǵy 7 iri ınvestısııalyq joba, sonyń ishinde, Kendirli kentinde sý tushytý zaýyty, Almaty qalasyn aınalyp ótetin temirjol jelisi, Aqtaý portynda konteınerlik hab, Taldyqorǵan – Úsharal magıstraldi gaz qubyry, Jambyl oblysynda jel qondyrǵylary bólshekterin shyǵaratyn zaýyt qurylystary iske asyrylady. Al Dostyq – Moıynty ýchaskesindegi ekinshi temirjoldy merziminen bir jyl buryn paıdalanýǵa berý josparlanyp otyr.
Qazaq Air AQ áýe kompanııasy men «Mobaıl Telekom-Servıs» JShS (Tele2) uıaly baılanys operatoryn strategııalyq ınvestorlarǵa satý jóninde mámileler jasaldy. Bul naryqtaǵy básekelestikti arttyrýǵa jáne Qazaqstan ekonomıkasynyń negizgi sektorlaryna ınvestısııa tartýǵa yqpal etedi.
Memleket basshysyna «Jaıly mektep» ulttyq jobasynyń oryndalýy týraly málimet berildi. Qazirgi kezde 106 mekteptiń qurylysy bitýge jaqyn, jyl sońyna deıin taǵy 102 oqý oshaǵyn salý josparlanǵan.
Qasym-Jomart Toqaev «Samuryq-Qazyna» AQ qyzmetiniń negizgi baǵyttaryna qatysty birqatar mindet júktep, kompanııa aktıvteriniń tıimdiligin joǵarylatý, qunyn arttyrý, sondaı-aq ınvestısııalyq jobalardy ýaqtyly jáne sapaly júzege asyrý jumystaryn jalǵastyrýdy tapsyrdy.
Budan bólek, Prezıdent Azııa, Eýropa jáne AQSh-taǵy álemniń eń iri qorlarymen uzaqmerzimdi ınvestısııalyq yntymaqtastyq ornatýdyń mańyzdy ekenin atap ótti.
