Kollajdy jasaǵan – Qonysbaı ShEJIMBAI, «EQ»
Sybaılas jemqorlyqqa qarsy is-qımyl agenttiginiń Pavlodar oblysy boıynsha departamenti orman qorǵaý salasyndaǵy sybaılas jemqorlyq táýekelderiniń syrtqy taldaýyn jasady. Taldaý kórsetkendeı, orman qorǵaý mekemeleri qyzmetiniń barlyq satylarynda jemqorlyq táýekelderi baıqalǵan. Jaǵymsyz faktor saladaǵy uıymdastyrýshylyq-basqarý býynynan bastap aǵash tutynýshylarmen baılanysqa deıingi satylarda anyqtalǵan.
– Pavlodar oblysynyń ormandary zańsyz kesilip jatyr. Muny qolymyzdaǵy statıstıkalyq derekter rastaıdy. Byltyr quramynda «Ertis ormany» rezervatynyń basshylyǵy bolǵan uıymdasqan qylmystyq toptyń jumysy toqtatyldy. Qylmystyq is sotta qaralyp jatyr. Buǵan qosa, rezervattyń Shaldaı fılıalynda jıyntyq quny 12 mln teńgege baǵalanatyn qaraǵaı tuqymynyń jetispeýshiligi anyqtaldy. Qazirgi ýaqytta tuqym rezervattyń balansyna qaıtaryldy, – deıdi Sybaılas jemqorlyqqa qarsy is-qımyl agenttiginiń Pavlodar oblysy boıynsha departamenti basshysynyń birinshi orynbasary Áset Ospanov.
Aımaqtaǵy orman resýrstaryn qalpyna keltirý – mańyzdy másele. Kóshet pen tuqym materıaldarynyń tapshylyǵy ormandy qalpyna keltirý jumystaryna qosymsha satyp alýlar uıymdastyrýdy talap etedi. Alaıda bıýdjet shyǵyndaryn aldyn-ala boljaý tenderlerde jemqorlyq qaýpin arttyratyny baıqalady. Ásirese kóshetterdi satyp alý barysynda bul qubylys jıi boı kórsetip qalady. Baqylaýdyń jetkiliksizdigi qarjynyń urlanýyna, satyp alý úderisindegi aıla-sharǵylarǵa qolaıly jaǵdaı týdyryp otyrǵanǵa uqsaıdy.
Sybaılas jemqorlyqqa qarsy qyzmet erekshe qorǵalatyn tabıǵı aýmaqtardaǵy jemqorlyq táýekelderin syrtqy taldaý qorytyndysy boıynsha 35 usynys engizgen. Onyń úsheýi oryndalsa, ózgesi iske asý kezeńinde.
«Ertis ormanyndaǵy» aǵash urlyǵy sonaý 90-jyldardan beri jalǵasyp kele jatyr. Tájirıbeli mamandar aldaǵy jyldary qaraǵaı kóshetterin egý, ormandy kúzetý jumystaryn júıeli uıymdastyryp, orman sharýashylyqtarynyń materıaldyq-tehnıkalyq bazasy nyǵaıtyla berse, kóp nátıjege qol jetkizýge bolatynyn aıtady. Alaıda mekeme basshylyǵynyń jıi aýysýy keıingi jyldary belgili bir keleńsizdikterdi týdyryp otyr. Buǵan deıingi basshylarynyń keıbiri zańsyzdyqqa jol berip, sottalyp ketti. Orman urlyǵy beleń alyp, kóldeneń kók attylar oılaryna kelgenin jasady. Bul beıbastaq áreketterdiń keıingi jyldary azaıyp kele jatqany málim. Endigi rette orman kúzetin nyǵaıtyp, quqyqtyq turǵydan jaýapkershilikti kúsheıte túsetin arnaıy zańdar qabyldanýy kerek. Ormanshylardyń mártebesin kóterip, eńbekaqylaryn ósirgen abzal. Sonda ynta da, jumys kórsetkishteri de arta túsedi.
Pavlodar oblysy
