Sýretterdi túsirgen – avtor
Jurtshylyq pikirimen sanasqan «Altynalmas»
Maıqaıyń kentindegi kenishtiń dál túbinde, sanıtarlyq-qorǵanys aımaǵynda ornalasqan 76 úıdiń máselesi byltyrdan beri sózbuıdaǵa salynyp kelgeni málim. Turǵyndardyń qýanyshyna oraı, «Maıqaıyńaltyn» AQ-nyń 100 paıyz aksııalaryn satyp alǵan «Altynalmas» AK kenttegi áleýmettik, ınfraqurylymdyq máselelerdi qarastyrýǵa birden kirisip ketti. «Shanhaı» shaǵyn aýdany turǵyndarynyń bazynasyn estip bilgen aksıonerlik qoǵam basshylyǵy 24 sáýir kúni atalǵan aýmaq turǵyndarymen kezdesý ótkizdi. Jurtshylyqpen júzdesýge jaqynda ǵana «Maıqaıyńaltyn» AQ bas dırektory bolyp taǵaıyndalǵan Danıal Nábıev, «Altynalmas» kompanııasynyń is basqarý dırektory Gúlnur Haletova, qoǵammen baılanys bóliminiń basshysy Nurbıke Rahımova, qoǵammen qarym-qatynas júrgizý mamany Temirlan Mádıev, Baıanaýyl aýdanynyń ákimi Ardaq Kisentaev pen kent basshysy Erbatyr Moldataev qatysty.
Kezdesýde tolǵaǵy jetip turǵan «Shanhaı» shaǵyn aýdanynyń máselesine qatysty kópshiliktiń usynystary men pikirleri tyńdaldy.
– Bizdiń maqsatymyz – kásiporyndy damyta otyryp, kent turǵyndary úshin qolaıly ómir súrý ortasyn qurý. Búgingi kezdesýimizdiń máni de osynda. Eń áýeli sizderdi nendeı máseleler tolǵandyratynyn bilgimiz keledi. Usynys-tilekterińizdiń nátıjesin jınaqtap, keıin olardy muqııat taldap, eń naqty ári durys sheshimderdi jarııa etemiz. Eski baspanalardyń turǵyndaryna ózge jerden úıler salyp beremiz be, álde olardy satyp alyp, tıisti deńgeıde qunyn ótep beremiz be, sony sizdermen birlesip aqyldasýymyz kerek. Men sizderdiń pikirlerińiz ben máselelerińizdi jaqynyraq bilsem deımin. Bul bar máselelerdi sheshý úshin asa mańyzdy, – dedi Danıal Nábıev.
Kásiporyn basshylyǵynyń halyqqa janashyrlyq nıetterin baıqaǵan kent turǵyndary sheshilip sóıledi. Olardyń sózinshe, «Shanhaıdaǵy» úılerdiń deni sonaý 50-60-jyldary saman kirpishten turǵyzylǵan. Kenishtiń jerastynda ken jarý jumystary kóptegen jyl boıy úzbeı júrgizilip keledi. Jarylys saldarynan úılerdiń sylaǵy túsip, irgetasy, qabyrǵalary jarylyp jatyr.
– Altyn kásipornynyń gúldenýine ata-analarymyz bar ómirlerin arnady. Qartaıǵan shaqta durys baspanaǵa qol jetkizip, beınetiniń zeınetin kórgisi keledi. О́kinishke qaraı, ol baqyt bizdiń aǵa býynǵa ázirge buıyrmaı tur. Qaýipti aımaqta turyp jatqan turǵyndardyń kóbiniń barar jeri, basar taýy joq, – dep muńyn shaqty jergilikti turǵyn Asqar Aıtmaǵambetov.
Tájik-aýǵan soǵysynyń ardageri Tólegen Botaev – kópbalaly otbasynyń otaǵasy. Eger kásiporyn onyń baspanasyn satyp alamyz dese, ol turǵyn úshin tıimdi emes. Sebebi úıi óte eski. «Sondyqtan meniń tilegim – úı salyp berińizder», degen naqty usynysyn jetkizdi ol.
Onyń sózin Atshabar Altybaı da qostady. Aqsaqaldyń úıindegi eki bólmeniń ishinde aǵash tireýler tur. Jańadan baspana salyp berse, qazir kóshýge daıyn ekenin bildirdi.
Endi bir turǵyndar óz úılerin qymbat materıaldar qoldanyp, záýlim etip qaıta salyp alǵandyqtan, aımaqtan qozǵalmaıtynyn jetkizdi. Sebebi múlikti baǵalaýshylar olardyń úılerine ózderi qalaǵan baǵany usynbaýy múmkin.
Maıqaıyńdyq ájeı Kájen Synǵadolla byltyrdan beri kópqabatty úıdegi páterge kóship ketkenin aıtady. «Shanhaıda» eski jer úıi qalyp otyr. Eski úıin baǵalap, qolyna qarajat berse, soǵan qanaǵat qylmaqshy.
«Altynalmas AK» AQ ókilderi sanıtarlyq-qorǵaý aımaǵynda ornalasqan úıler ıeleriniń árqaısysymen jeke-jeke sóılesiletinin jetkizdi. Bul jerde úıdiń jaǵdaıy ǵana esepke alynbaıdy, kólemi, jer telimi, aýlasy, bári-bári baǵalaý ólshemderinde kórsetiledi.
– Buǵan deıin Aqmola oblysyndaǵy Aqsý kentinde ornalasqan bizdiń kompanııaǵa tıesili kásiporyn aınalasynda osyndaı másele týyndaǵan. Turǵyndarmen kelisim boıynsha, táýelsiz baǵalaý kompanııasynyń kómegimen 2020 jyldan bastap qaýipti aımaqta ornalasqan 202 úıdi baǵalap, satyp aldyq. 2025 jyldyń basynan beri 42 úı satyp alyndy. Bizge ár úı ıesiniń sheshimi mańyzdy. Eger aqshalaı tólemge kelisse, eki kúnniń ishinde barlyq resimderdi júrgizip, esepshotyna qarajatty aýdaryp beremiz, – dep atap ótti.
Osylaısha, qazirgi ýaqytta «shanhaılyq» úı ıeleriniń pikiri úshke jarylyp tur. «Altynalmas AK» AQ basshylyǵy tek «Shanhaı» ǵana emes, tutas kenttiń áleýmettik-ınfraqurylymdyq jaǵdaıyn damytýǵa yntaly ekenin bildirip otyr. Bul úshin kompanııa oblys ákimdigimen áleýmettik jaýapkershilik boıynsha arnaıy memorandýmǵa otyrýdy oıǵa alǵan.
О́ndiristik kórsetkishter kemimeıdi, tek údeı túsedi
Bas dırektor Danıal Nábıevtiń aıtýynsha, aksıonerlik qoǵam jyldar boıy úıilip qalǵan tehnogendi mıneraldy túzilimderdi (TMT) óńdeý maqsatynda jańa fabrıka salýdy uıǵaryp qoıǵan. Ol ashylǵanda, TMT óńdeý kezeńinde óndiristik kórsetkishter ulǵaıyp, Maıqaıyń halqy úshin jańa jumys oryndary qurylady. Qazir kásiporynda 1000-nan asa adam eńbek etse, onyń 380-i kenishte qyzmet jasaıdy. Buǵan qosa keleshegi bar dep sanalatyn taǵy 6 alań anyqtalǵan. Olardyń biri – Alpys ken orny, onda geologııalyq barlaý jumystary júrgiziletin bolady.
– Biz úshin negizgi basymdyq – eńbek qaýipsizdigin arttyrý. Jeke qorǵanys quraldaryn, arnaıy kıimderdi jańartýdy bastadyq. О́tken jyldan beri beton toltyrý kesheni iske qosyldy. Maýsym aıynda ár qyzmetkerdiń ornalasqan jerin qadaǵalaıtyn shahta jumyskerlerin pozısııalaý júıesi iske qosylady. Ekinshi mańyzdy másele – eńbek jaǵdaıyn jaqsartý. Kıim aýystyrý, jýyný bólmelerin jańartý, tamaqtaný sapasyn arttyrý, taǵy basqa jaıttar nazarǵa alyndy. Úshinshiden, óndiristik jospardy oryndaý. Qyzmetkerlerimizdiń eńbekaqysy, bıýdjetke tólenetin salyq, kentke áleýmettik qoldaý – óndirisimizdiń únemi toqtamaı júrip turýyna táýeldi, – deıdi ol.
Pavlodar oblysy,
Baıanaýyl aýdany,
Maıqaıyń kenti
