Sýret: instagram.com/tumocenter/
«Astana Hub»-tyń bas dırektory Maǵjan Mádıevtiń aıtýynsha, «TUMO» – Armenııada ázirlengen halyqaralyq úlgidegi ınnovasııalyq qosymsha bilim berý modeli. «Mundaı ortalyqtyń elordada ashylýy – elimizdiń álemdik bilim qaýymdastyǵyna qosylyp, jastardyń sıfrlyq saýattylyǵyn arttyratyn mańyzdy qadam. Bul baǵdarlama aıasynda 12–18 jas aralyǵyndaǵy oqýshylar tolyq tegin bilim alady. Bir jaǵynan, olarǵa zamanaýı sıfrlyq ári kreatıvti daǵdylardy meńgerýge jol ashylady», dedi ol.
Baǵdarlama 11 negizgi baǵytty qamtıdy. Onyń qatarynda generatıvti jasandy ıntellekt, oıyn ázirleý, anımasııa, kınoóndiris, 3D modeldeý, robottehnıka, grafıkalyq, moýshn-dızaın, baǵdarlamalaý, mýzykalyq kompozısııa jáne veb-ázirleý sekildi suranysqa ıe salalar bar.
Ortalyqtaǵy oqý úderisi «TUMO Path» platformasy arqyly júzege asady. Bul alań árbir oqýshyǵa qyzyǵýshylyǵy men maqsatyna saı jeke bilim traektorııasyn quryp, ony birtindep jetildirýge múmkindik beredi. Oqýshylar alǵan bilimin praktıkalyq tapsyrma arqyly bekitip, vorkshop-lıderlerdiń jetekshiligimen naqty jobalarǵa qatysyp, damý jolyn aıqyndaıtyn jeke portfolıo jasaıdy.
«Qazaqstanda «TUMO» modelin tanystyrý – bizge úlken mártebe. «Astana Hub»-pen áriptestik maqsatymyz úndesedi. Bastysy, jastardy bolashaqta suranysqa ıe sıfrlyq jáne shyǵarmashylyq daǵdylarmen qarýlandyrý. «TUMO Astana» qazaqstandyq jastarǵa álemniń ár túkpirindegi 80 myńnan astam oqýshynyń ómirin ózgertken joǵary sapaly baǵdarlamany usynady», dedi «TUMO»-nyń damý jónindegi dırektory Bekor Papazıan.
2011 jyly Erevanda negizi qalanǵan biregeı bilim modeliniń 7 elde ornalasqan 18 ortalyǵy bar. Qazirgi tańda mundaı ortalyqtar Armenııadan bastap, Fransııa, Germanııa, Portýgalııa, Ýkraına jáne Albanııada tabysty jumys istep tur.
Elimizde ashylatyn «TUMO» ortalyǵy bas shahardaǵy «alem.ai» halyqaralyq jasandy ıntellekt ortalyǵynda ornalasady. Al onyń jumysy aldaǵy qazan aıynda bastalady.
Aıta keteıik, atalǵan joba el úkimetiniń 5 jyl ishinde 1 mıllıon adamdy sıfrlyq daǵdylarǵa oqytýǵa baǵyttalǵan strategııalyq bastamasy sheńberinde júzege asyp otyr. Bul «AI Movement» qozǵalysynyń «Tomorrow School», «People Bootcamp», «AI’preneurs», «QazCoders» sekildi basqa da mańyzdy jobalarymen tyǵyz baılanysty.
