Bekdaıyr Nyǵmetulynyń kózqarasynsha, «áke degen uly uǵymǵa» daq túsirmeý kez kelgen er-azamattyń mindeti bolýy kerek.
«Bizdiń bala kúnimizde qandaı da bir másele bolsa, analarymyz ákeleriń biledi, ákeleriń sheshedi dep otyratyn... Ákeniń qadirin analarymyz bizge solaı sińirdi. «Ákelerińdi syılańdar, ol sender úshin kúndiz-túni eńbek etip júr» deıtin. Qazir oı tarazysyna sala kele, bul sózde qanshama mán-maǵyna, tálim bar ekenin uǵyndyq», dedi Bekdaıyr Kúzembaı.
Onyń aıtýynsha, áıel adam men balalar jaýapkershiligi mol ákeni qurmet tutady. «Er azyǵy túzde», dep jatady, degenmen, naǵyz áke nan tabýmen ǵana shektelmeı, balaǵa da kóńil bólýi kerek.
«Qazir zamana talaby, ýaqyt ólshemi, adamdardyń kózqarasy ózgergenin eshkim teriske shyǵara almaıdy. Áke meıirimine bólenbegen bala – elin, ultyn súıetin azamat bola ala ma? Sol úshin áke túzde júrip, úıdiń de jaıyn oılaǵany jón», deıdi B.Kúzembaı.
Ol keıbir balalardyń túzý joldan taıý sebepterine de toqtaldy.
«Balanyń qalyptasýyna ata-anasy, týystary, dostary, ustazdary, bir sózben aıtqanda ortasy áser etetini beseneden belgili. Bala osylardyń qaısysymen kóbirek ýaqyt ótkizip, qaısysyn úlgi tutsa soǵan minez-qulqy uqsap ketedi eken. «Dostary kimder, qorshaǵan ortasy qandaı» degen oımen ákeler (analar da) balalarymen qanshalyqty ashyq syrlasady, másele osynda? Mine bul oılanatyn másele. Meniń estýim boıynsha, ata-ana balasyn kúnine keminde on eki ret qushaqtap, jaqsy kóretinin aıtýy kerek eken. Al biz qazir qandaımyz? «Abaıdyń shyqqan bıigi, Qunanbaıdyń ıyǵy» deıtin aýyzsha aıtylyp júrgen ónegeli sóz bar, balasynyń ǵulama, ǵalym bolmasa da, eń bastysy adam bolýyn oılaǵan áke áýeli ózi myqty bolýy qajet», dedi Bekdaıyr Nyǵmetuly.
«Ákeler odaǵy» ókiliniń aıtýynsha, myqty áke degenimiz – jaýapkershilikti moınyna alyp, álsizge ses kórsetpeıtin, qıyndyq kelse qorǵan bola biletin, otbasyn saqtaý úshin jaýǵa da, daýǵa da qarsy tura alatyn adam.
«Qazir biz adamǵa óte qajet qundylyqtardyń biri – meıirimnen aıyrylyp bara jatyrmyz. Adamnan meıirim ketse, júregi tasqa, kóńili laıǵa aınalady. Ákege de keregi – meıirim. Meıirimdi áke ózgege de, ózine de qııanat jasamaıdy. Ákesi (anasy da) balasyna durys tárbıe berý úshin ózi úlgili bolsa, ata-anasyna qarap, balasy boı túzeıtini anyq», deıdi «Ákeler odaǵynyń» ókili Bekdaıyr Kúzembaı.
