Semınar-keńeske elimizdiń túkpir-túkpirinen kelgen jas qalamgerler, mınıstrlik janynan qurylǵan «Alqa» ádebı klýbynyń músheleri jáne jergilikti zııaly qaýym ókilderi qatysty.
Alqaly jıynda qalamgerler qazirgi qazaq ádebıetiniń damý úrdisi, shyǵarmashylyq izdenister, kitap shyǵarý isi men ádebı jobalar jaıly pikir almasyp, tájirıbe bólisti. Sondaı-aq is-shara barysynda ulttyq ádebıettiń altyn qoryna engen 100 kórnekti týyndyny anyqtaýǵa baǵyttalǵan jalpyulttyq saýalnama keńinen talqylandy.
Eki kúnge sozylǵan baǵdarlama aıasynda qatysýshylar Joshy han, Alasha han jáne Dombaýyl keseneleri men Han Oordasy sııaqty tarıhı-mádenı nysandardy aralap, ult shejiresine qatysty mańyzdy derektermen tanysty.
Is-shara sheńberinde oblystyq «Ular» ádebı klýbynyń keńsesi ashylyp, S.Qojamqulov atyndaǵy Ulytaý oblystyq qazaq mýzykalyq-drama teatrynyń qoıylymy kórermenge usynyldy.
Aıta keteıik, QR Mádenıet jáne aqparat mınıstrliginiń janynan qurylǵan «Alqa» jastar ádebı klýby jas qalamgerlerdi qoldaý, tarıhı-rýhanı murany nasıhattaý baǵytynda buǵan deıin Astana, Almaty, Jetisý, Abaı jáne Qaraǵandy oblystarynda ádebı týrlar men kóshpeli otyrystar ótkizgen bolatyn.
Semınar-keńestiń negizgi maqsaty – Ulytaýdyń tarıhı, rýhanı jáne mádenı mańyzyn nasıhattaý arqyly ulttyq biregeılikti nyǵaıtý, otandyq aqyn-jazýshylardyń shyǵarmashylyǵy arqyly el rýhyn kóterý jáne Ulytaý óńiriniń ult tarıhyndaǵy aıryqsha ornyn keńinen tanytý.
