Foto: zakon.kz
Ulttyq mýzeıge rýhanı saıahat
О́tken túni Astanadaǵy Ulttyq mýzeı murasyna 37 563 kórermen kózaıym boldy. Kelýshiler 20 zaldan turatyn ekspozısııalyq alańdardaǵy jádigerler týraly tereń maǵlumat aldy. Merekege oraı gıd qyzmetin elge esimi belgili telejúrgizýshiler Dana Nurjigit, Zeıin Álipbek, Erqanat Kópjasar, Irına Ten t.b atqardy. Sondaı-aq, «Mıras» úıirmesiniń zerek shákirtteri men «baldyrǵan gıdter» bal tilimen kóne dáýir zaldaryna jetelep, tarıhtyń taǵylymdy qupııalaryn erekshe yqylaspen áńgimeledi. Al «Kúmis jas» jobasynyń qatysýshylary júrek terbeter áńgimeleri arqyly mádenı muramyzdyń mánin tereńnen tolǵady.
Teatraldandyrylǵan ekskýrsııa ótken dáýirdiń únin sezindirip, kóne tarıhpen júzdestirdi. Bul sıqyrly túnde jádigerlerge jan bitip, kvest sabaqqa belsendi atsalysty. Mýzeıdiń ár buryshynda josparlanǵan mýzykalyq, sheberlik sabaqtary sımfonııa únimen astasyp, erekshe atmosferalyq lep esti.
Aımaqtardaǵy alýan-alýan shara qalaı ótti?
Mýzeı túni el ishindegi tarıhı-ólketaný, memorıaldyq mýzeılerdiń esigi de aıqara ashyq boldy. Barlyǵy derlik arnaıy sharalar uıymdastyryp, tarıhtyń tiri tilin - qorjynyndaǵy jádigerlerin jarqyrata usyndy.
Almaty oblysynda «Babalar tili - mýzeıler úni» sharasy Qonaev qalasynyń basty alańynda ashyq aspan astynda ótti. Shara barysynda aımaqqa qarasty mýzeıler men Esik memlekettik tarıhı - mádenı mýzeı qoryǵy, Tańbaly memlekettik tarıhı-mádenı jáne tabıǵı mýzeı-qoryǵy mýzeıi kórme jasaqtady. Sharada barysynda kúnbasty adamdar, saq, ǵun dáýirinen belgili abyz bıler, handar men aqyn, batyrlardan bastap Qonaev atamyzǵa deıingi babalarymyzdyń júrip ótken jolyn bederleıtin qoıylym qoıyldy.
Shyǵysta da mýzeı merekesi shyraıly ótti. Semeı qalasynyń oblystyq tarıhı-ólketaný mýzeıindegi shara «Ýaqyt jáne mýzeı» taqyrybynda órbidi.
Merekelik sharaǵa myńǵa jýyq adam qatysyp, týǵan ólke tarıhynan taǵlymdy maǵlumat alyp, kórme-jármeńkelerge kýá boldy. Sondaı-aq mýzeıge kelýshiler uly Abaı Qunanbaıuly, Álıhan Bókeıhan, Shilikti altyn adamy men Úrjar hanshaıymy jáne Qazaq batyry naqyshynda kıingen keıipkerlermen sýretke túsý úshin fotozona uıymdastyryldy.
Bul kúni batystaǵy Aqtóbe óńiri qazaqtyń batyr qyzy Álııa Moldaǵulovanyń memorıaldyq mýzeıinde bas qosty. Maıdangerdiń 100 jyldyǵymen týra kelgen sharada turǵyndar onyń ómiri men erligine qatysty vıktorınada baq synady. Soǵys jyldaryndaǵy beıneni halyq boıyna jaqyndata túsý úshin qaraqumyqtan ázirlengen as taratyldy.
Túrkistan oblystyq tarıhı-ólketaný mýzeıinde «Mýzeı barshaǵa ashyq» birkúndik aksııasy ótti. Kelýshiler mýzeı eksponattaryn sham jaryǵymen tamashalady. Osy mádenı ordaǵa qarasty aýdandardaǵy 24 mýzeıde de taǵlymdy sharalar, arnaıy baǵdarmalamar uıymdastyryldy.
Osylaısha, elimizdiń túkpir-túkpirindegi mádenıet ordalary 14: 00-00: 00 aralyǵynda, tún aýǵansha qalyń qaýymǵa qyzmet kórsetti.
