Súrilgen nysandardyń ishinde turǵyn úı keshenderi, ákimshilik ǵımarattar, japsarjaılar, dámhanalar, kólik jýý oryndary jáne basqa da qurylystar bar. Eń iri nysandar qatarynda «Mechta» taýnhaýsy, «KHAN» TÚK jáne Dostyq dańǵylyndaǵy 7 qabatty ákimshilik ǵımaratty ataýǵa bolady.
Seısmıkalyq talaptardy eskermeı, taý bókterine zańsyz qurylys salatyndarǵa da talap kúsheıe tústi. Osyndaı 38 nysanǵa qatysty sot sheshimi shyǵyp, olardyń 12-si tolyq nemese jartylaı buzylǵan. Taǵy 3 nysanda qurylys jumystary bastapqy kezeńde toqtatylǵan.
Jaýaptylar, buzý jumystary tek sot sheshimi men tıisti qujattar negizinde, sot oryndaýshylarynyń qatysýymen júrgiziletinin aıtady.
«Zańsyz qurylysqa baqylaýdy kúsheıtý – qazirgi kúnniń talaby. Qala ınfraqurylymyna, kólik jáne áleýmettik júıege júkteme artyp barady. Ruqsatsyz, beıbereket qurylys tek qalanyń damýyna emes, turǵyndardyń qaýipsizdigine de tikeleı qaýip tóndiredi. Ásirese, taýly aımaqtaǵy qurylysqa erekshe nazar aýdarý qajet. Bul aýmaqtar seısmıkalyq turǵydan álsiz ári qaýipti aımaqtar. Osyndaı jerlerdegi zań buzýshylyqtar óte aýyr saldarǵa ákelýi múmkin. Eń bastysy, barlyq súrý jumysy zań aıasynda sot sheshimimen ǵana júzege asyrylyp jatyr. Bul barshaǵa ortaq ereje men ádilettilik kepili. Almatyda atqarylyp jatqan bul sharalar basqa qalalar úshin de úlgi bola alady», deıdi ýrbanıst jáne qoǵam qaıratkeri Gúlmıra Baıǵabulova.
