Atyraýda Uly Jeńiske arnalǵan respýblıkalyq aıtys ótti

ATYRAÝ. 6 mamyr. Atyraýda «Urpaqqa uran bolǵan Uly Jeńis» atty aqyndardyń respýblıkalyq aıtysy ótti. Oǵan «Nur Otan» partııasy qoldaý kórsetti. Bas júlde – 2 000 000 teńge jeńimpaz atanǵan Bolatbek Orazbaevqa berildi. Bul týraly egemen.kz tilshisi habarlady. Ulttyq ónerge eleńdemeıtin qazaq bar ma?! Ásirese, Atyraýda aıtys ótedi degeli jurtshylyqtan degbir qalmady. Munyń birneshe sebebi bar. Birinshiden, buǵan deıin munaıly óńirde dál mundaı aýqymdy aıtys ótpep edi. Ekinshiden, urpaqtan urpaqqa mıras bolǵan bul jyr báıgesi Uly Jeńistiń 70 jyldyǵyna arnaldy. Úshinshiden, oǵan birneshe jergilikti aıtyskerler de qatysty. Tórtinshiden, Atyraýdaǵy aıtysqa tek ulttyq ónerdiń has sheberleri, Memlekettik syılyqtyń úsh ıegeri, Halyq ártisi Asanáli Áshimov, ánshi-kompozıtorlar Altynbek Qorazbaev pen Bekbolat Tileýhan, aqyndar, Jazýshylar Odaǵy tóraǵasynyń orynbasary Janarbek Áshimjan, aıtysker Mels Qosymbaev jáne Jazýshylar Odaǵy Atyraý fılıalynyń tóraǵasy Qoıshyǵul Jylqyshıev qazylyq etti. Sondaı-aq, jyr báıgesiniń tizginin osy ónerdiń ystyq-sýyǵyna ábden tózgen Júrsin Erman ustady. Aıtqandaı, bul aıtys alystaǵy Qytaıdan kelgen qandasymyz Zýra Shaımuratqyzynyń qatysýymen de erekshelendi. «Urpaqqa uran bolǵan Uly Jeńis» taqyrybymen ótken aıtysqa «Nur Otan» partııasy qoldaý kórsetti. Oǵan elimizdiń ár óńirinen 20-dan astam aqyn qatysyp, eki kún boıy Mahambet atyndaǵy drama teatrdy jyr keshine bóledi. Sóz saptaýy, maqamy, sýyrypsalmalyǵy jóninen birinen biri ótken aqyndardyń keıbiri birinshi kúni jurtshylyq yqylasyna bólengenmen, ekinshi kúni kibirtiktep qalǵandary da kezdesti. Degenmen, aıtys aqyndary tek bir taqyrypty ǵana jyrlaýmen shektelmeıtini anyq. Bul joly aıtyskerler eldik máselelerdi de qaǵys qaldyrmady. Aýyldaǵy aǵaıynnyń áleýmettik máselesi, rýhanııat pen eldik murattardy astarlap jetkizgen aqyndardyń arasynda utymdy ázilimen el-jurtty qyran-topan kúlkige keneltkenderi de joq emes. Ásirese, Maqsat Aqanovtyń qyzdarmen ázili, Erkebulan Qaınazarovtyń jańyltpashy, Meıirbek Sultanhan men Bolatbek Orazbaev, Shalqarbaı Izbasarov pen Baýyrjan Halıollanyń, sonymen birge, Bekarys Shoıbekovtiń astarly oıǵa qurylǵan sóz saptaýlary tyńdarmandy bir jelpintti. Eki kúndik aıtystyń qorytyndysynda ádilqazylar toby úshinshi orynǵa Baýyrjan Halıolla, Meıirbek Sultanhan jáne Erkebulan Qaınazarovty laıyq dep tapty. Olardyń árqaısysyna 400 myń teńgeden syıaqy berildi. Al ekinshi júldege ıe bolǵan Shalqarbaı Izbasarov pen Bekarys Shoıbekovtiń enshisine 700 myń teńgeden syıaqy buıyrdy. Birinshi júldeni ıelengen Maqsat Aqanovtyń ónerine 1 000 000 teńgemen baǵalandy. Aıtystyń bas júldesi – 2 000 000 teńge Bolatbek Orazbaevqa tapsyryldy. «Partııa úshin eldikti jyrlaǵan, Elbasynyń Saılaýdaǵy jeńisin pash etken, keshegi Uly soǵys jeńimpazdarynyń erligin dáriptegen aıtysty qoldaý asa mańyzdy. Elbasy aldymyzǵa maqsat etip qoıǵandaı, biz eldik sana, tól mádenıet, otbasylyq qundylyqtar, rýhanııat, tildi udaıy ardaqtaýǵa ázirmiz. Elimizdiń bolashaǵy – jastardy tárbıeleý – bizdiń basty maqsatymyz. Elbasy aıtqandaı, elimiz qýatty bolýy úshin eń birinshi ulttyń rýhy bıik bolýy kerek. «Nur Otan» partııasy aıtysty árdaıym qoldaı beredi. Aıtysta aıtylǵan syndardy bizdiń fraksııa depýtattary qaǵazǵa túrtip alyp, ol máselelerdiń sheshilýine yqpal etetin bolady», – dedi  «Nur Otan» partııasy Tóraǵasynyń birinshi orynbasary Baýyrjan Baıbek. Joldasbek Shópeǵul. Derek: egemen.kz. Sýret: Rahym Qoılybaev.