Elimizdiń birqatar óńiri jáne kórishiles Qyrǵyzstannan kelgen ardagerlerdiń basyn qosqan jarystyń ashylý saltanatynda Tehnıka ǵylymdarynyń doktorlary Ishenbek Jaqypybekov pen Nurlan Aıtymbetov, QR Qurmetti qurylysshysy Toqmaǵamet Ibragımov, Ekonomıka ǵylymdarynyń kandıdaty, professor Qanybek Qaldybaev sóz sóılep, qatysýshylarǵa sáttilik pen aq jol tiledi. Al Jetisý oblysy bılıard federasııasynyń prezıdenti Toqtar Esimov atalǵan oblys ákimi men Taldyqorǵan qalasy ákiminiń Qurmet gramotasy, oblystyq Dene shynyqtyrý jáne sport basqarmasy basshysynyń Alǵys hatyn Jaqsyqul Myrzahmetulyna tabys etti.
Jarystyń ózine keler bolsaq, jekelegen saıysta Qyrǵyzstannan kelgen «Qara-Balta» komandasynyń múshesi Oleg Kımge teń keler eshkim tabylmady. Ol bas júldemen qatar 150 000 teńgeni enshiledi. Kúmis medaldi Shymkenttiń «Turany» klýbynyń oıynshysy Alık Mahanov ıelendi. Oǵan 100 000 teńge buıyrdy. Jergilikti «Koronanyń» marqasqasy Murat Jaılaýbaev qolaǵa qol sozyp, 50 000 teńgeni qaltasyna basty.
Komandalyq básekede 14 ujym sheberlik baıqasty. Solardyń arasynan Almatynyń «Koronasy» ozyp shyqty. 700 000 teńgeni oljalaǵan jeńimpazdardyń sapynda Qanybek Qaldybaev, Artyqbaı Sanaqulov, Panabek Sarǵaldaqov, Muratqan Sháıdemov, Murat Jaılaýbaev, Valerıı Mýsıenko jáne Alym Mashýrov syndy bılıarshylar asqan sheberlik tanytty. Olardy osy jarysqa Ǵabıden Qaıymsultanov baptap ákeldi. Fınalda «Korona» Taldyqorǵannyń «Jetisý-1» klýbyn qapy qaldyrdy. Qyrǵyzstannyń «Qara Baltasy» úzdik úshtikti túıindedi. Jartylaı fınalǵa deıin jetken komandalardyń árqaısysyna 400 000 jáne 200 000 teńgeden tabys etildi.
