AQTО́BE. 6 mamyr. Aqtóbede Uly Jeńistiń 70 jyldyǵy jáne 7 mamyr – Otan qorǵaýshylar kúni qarsańynda Qazaqstannyń Tuńǵysh Prezıdenti Nursultan Nazarbaev atyndaǵy ortalyq mádenıet jáne demalys saıabaǵynda «Áskerge shaqyrýshylar kúni» ótkizildi. Sharaǵa Uly Otan soǵysynyń ardagerleri, tyl eńbekkerleri, áskerge shaqyrýshylardyń ata-analary, Aýǵan jáne lokaldy soǵystardyń ardagerleri, áskerı qyzmetshiler, kýrsanttar, stýdentter, mektep oqýshylary jáne patrıottyq klýbtardyń músheleri qatysty. Bul týraly egemen.kz tilshisi habarlady.
Oblys ákimi Arhımed Muhambetov sóz sóılep, jınalǵandardy alda kele jatqan mereıli merekelermen quttyqtady. Egemendi elimizdiń qarýly kúshteriniń qýattylyǵyna toqtala kelip, TMD elderiniń arasynda aldyńǵy qatarda ekenin atap ótti. Oǵan aqtóbelikterdiń ózindik úles qosyp kele jatqanyn, tek táýelsizdik alǵannan bergi ýaqytta 16 myńnan astam aqtóbelik ásker qatarynda bolǵanyn, al, bıyl 2 myńnan astam jastardyń ásker qataryna shaqyrylyp otyrǵanyn jetkizdi. Uly Otan soǵysynyń ardageri Andreı Andreev pen oblystyq qorǵanys isteri departamentiniń basshysy, polkovnık Ǵalymjan Jantórın áskerge attanýshylarǵa aq jol tiledi.
Áskerge shaqyrylǵandar atynan sóz alǵan Danııar Ǵalymjanov aǵa urpaqtyń erlik isterine adal bolatyndaryn, áskerde jaqsy qyzmet etip, aqtóbelikterdi uıatqa qaldyrmaıtyndaryna sendirdi.
Aqtóbelik sarbazdar «Batys» aımaqtyq №41433 áskerı bólimde Otan aldyndaǵy boryshtaryn óteıtin bolady.
Shara aıasynda Uly Otan soǵysynyń ardagerleri men áskerge attanýshylarǵa estelik syılyqtar tabystaldy.
Satybaldy Sáýirbaı.
Derek: egemen.kz.
Sýret: Haıredın Raýshanov.
