foto: ashyq derekkóz
Joǵary aýdıtorlyq palatanyń tapsyrmasy boıynsha qus etin óndirý jáne ótkizý naryǵyndaǵy básekelestikke jospardan tys taldaý júrgizilgen. Aýyl sharýashylyǵyn sýbsıdııalaýǵa bólingen bıýdjet qarajatynyń paıdalanylýyna júrgizilgen aýdıtten keıin osyndaı zertteý júrgizý qajettigi týyndady. Maqsaty – naryqta ústem nemese monopolııalyq jaǵdaıdy ıelengen qatysýshylardy anyqtaý, baǵanyń qalaı ózgergenin qadaǵalaý, sondaı-aq qoldanystaǵy memlekettik qoldaý sharalarynyń saladaǵy básekelestikke qalaı áser etetinin baǵalaý.
Sonymen, jospardan tys taldaý byltyr Qazaqstanda 358,7 myń tonna qus eti óndirilgenin, onyń 42 myń tonnasy eksportqa shyǵarylǵanyn kórsetti. Al ımport kólemi 135,7 myń tonna bolǵan, ıaǵnı ishki naryq ımporttyq ónimge áli de joǵary deńgeıde (bul shamamen 30%) táýeldi bolyp otyr.
Memlekettik aýdıt nátıjesinde shaǵyn óndirýshilerge memleketten qoldaý alýǵa bóget jasaıtyn kedergiler anyqtaldy. Saraptaý barysynda belgili bolǵanyndaı, shaǵyn óndirýshilerdiń memleketten qoldaý alýyna kedergi keltiretin kúrdeli rásimder kóp. О́tinim berý merzimderi tyǵyz, talap etiletin qujattar toptamasy qalyń. Nátıjesinde naqty óndiristik áleýeti bar kóptegen kompanııa is júzinde qoldaý júıesinen ajyrap qalyp otyr. Buǵan qosa sýbsıdııa alǵan keıbir óndirýshilerdiń túpkilikti baǵasy memlekettik qoldaý almaǵandarǵa qaraǵanda anaǵurlym joǵary.
Ahýaldy jaqsartý úshin Básekelestikti qorǵaý jáne damytý agenttigi Aýyl sharýashylyǵy mınıstrligine tıisti usynymdar joldady. Memlekettik aýdıt qorytyndysy boıynsha Joǵary aýdıtorlyq palatanyń basqa da tapsyrmalary tolyq oryndalǵanǵa deıin baqylaýda bolady.
