Foto: Ashyq derekkóz
QMA resmı ókili Erjan Taıjannyń aıtýynsha bul rette kólik quralynyń jasyna qaraı bastapqy tirkeý alymdarynyń mólsherlemesi tómendetiledi.
«Sońǵy úsh jyl ishinde Agenttiktiń aýmaqtyq departamentteri kólik quraldaryn bastapqy tirkeý úshin alym tóleýden jaltarý faktileri boıynsha 88 qylmystyq isti tergedi. Bul ister boıynsha 1 800-den astam avtokólik zańsyz tirkelgen. Memleketke keltirilgen zalal 11,8 mlrd teńgeni qurady», dedi E.Taıjan.
Onyń málimetinshe kúdikti retinde 70 adam tanylǵan, olardyń qatarynda Ákimshilik polısııa basqarmasynyń basshylary men qyzmetkerleri, «Azamattarǵa arnalǵan úkimet» memlekettik korporasııasynyń ókilderi jáne notarıýstar bar.
Nátıjesinde memleketke 900 mln teńge kóleminde alymdar tólengen. Sonymen qatar, quny 31 mlrd teńge bolatyn 1 500 avtokólikke jáne 968 mln teńgeniń kúdiktilerge tıesili múlkine tyıym salynǵan. Máselen, Aqmola oblysynda Ákimshilik polısııa basqarmasynyń qyzmetkeri bar topqa qatysty úkim shyǵaryldy. Olar 2020 - 2022 jyldar aralyǵynda 55 júk kóligin zańsyz bastapqy tirkeý arqyly memleketke 401 mln teńge kóleminde zalal keltirgen. Sot olardy 2,5 jyl merzimge bas bostandyǵynan aıyrdy.
Sonymen qatar memleket kirisine jalpy quny 125 mln teńgeni quraıtyn 3 páter men jeke turǵyn úı, sondaı-aq 21 mln teńge aqshalaı qarajat tárkilendi.
Qarjy monıtorıng agenttigi azamattardan ekonomıkalyq quqyq buzýshylyq jasaý faktileri belgili bolsa, bul týraly «AFM Insider» telegram botyna habarlaýdy suraıdy. Anonımdilikke kepildik beriledi.
