Oblys ákiminiń orynbasary Jasulan Bısembıevtiń aıtýynsha, 2023–2025 jyldarǵa arnalǵan keshendi jospardaǵy 16 tarmaqtyń 4-eýi tolyq oryndalmaı otyr.
«Birinshiden, túngi klýbtardaǵy reıdtik sharalar júıesiz júrgizilgen. Ekinshiden, CADCA ádisnamasy negizindegi jergilikti model qalyptastyrylmaı otyr. Úshinshiden, oblystyq psıhıkalyq densaýlyq ortalyǵynda emdelýshilerdiń tigin sheberhanalarynda jasaǵan túrli buıymdary satylmaı qalǵan», dedi Jasulan Bısembıev.
Oblystyq densaýlyq saqtaý basqarmasynyń basshysy Qaısar Abdalıevtiń deregine qaraǵanda, 4 aıda psıhıkaǵa áser etetin belsendi zattardy qoldanǵan 2500-den astam adam dınamıkalyq baqylaýǵa alynǵan.
«Qazir Atyraý oblysynda esirtkige táýeldilikpen 530-ǵa jýyq adam tirkeýde tur. Onyń ishinde 76 adam stasıonarlyq em qabyldady. Májbúrlep emdeý bólimine 18 adam jatqyzyldy. Arnaıy OAQT baǵdarlamasymen sáıkes 8 naýqas emdelip jatyr. Al 13 adam esirtkiden bas tartty», deıdi Qaısar Abdalıev.
«Basty maqsatymyz – jastardy esirtkige táýeldilikten arashalaý. Bul kúreske qoǵam bolyp jumylýymyz qajet. Ár vedomstvo, ár adam óz úlesin qosqanda ǵana nátıje bolady. Biraq, osy kezge deıin josparlanǵan jumys óz deńgeıinde atqarylmaǵandyqtan, bul máseleni baqylaýda ustaıtyn bolamyz. Naqty nátıjelerge qol jetkizý úshin júıeli is-sharalar atqarylýy qajet», deıdi Jasulan Bısembıev.
