Is-shara barysynda QR Tótenshe jaǵdaılar mınıstrliginiń Azamattyq qorǵanys jáne áskerı bólimder komıteti tóraǵasynyń orynbasary Aqylbek Ahmetjanov málimdeme jasady.
Qazaqstanda shomylý maýsymy 1 maýsymda resmı túrde bastalady. Qazirgi tańda respýblıka boıynsha 698 shomylýǵa ruqsat etilgen oryn bar: olardyń 458-i – jeke menshik jaǵajaılar, 227-si – kommýnaldyq, al 13-i – týrızm men sport nysandaryna tıesili. Sonymen qatar, taǵy 84 qaýipsiz sýǵa túsý aımaǵyn uıymdastyrý jumystary júrgizilýde. Barlyq aqparattar «2GAJ» qosymshasy arqyly qoljetimdi.
Tótenshe jaǵdaılar mınıstrligi ortalyq memlekettik organdar jáne jergilikti ákimdiktermen birlesip, shomylý maýsymyna aldyn ala daıyndyq jumystaryn júrgizýde. Bul keshendi sharalar sý aıdyndarynda azamattardyń qaýipsizdigin qamtamasyz etýge baǵyttalǵan.
«Júrgizilgen aldyn alý sharalary nátıjesinde 2021–2024 jyldar aralyǵynda sýǵa batyp qaıtys bolǵandar sany 51%-ǵa tómendedi. Tek ótken maýsymda elimizdiń sý aıdyndarynan 258 adam, onyń ishinde 66 bala qutqaryldy», dedi Aqylbek Ahmetjanov.
Alaıda, barlyq aldyn alý sharalaryna qaramastan, sońǵy tórt jylda elimizde 843 adam, onyń ishinde 260 bala sýǵa ketip, qaıtys bolǵan.
Jyl basynan beri 11 562 balaǵa júzý mashyqtary úıretildi. Bul baǵdarlama ári qaraı jalǵasatyn bolady.
Profılaktıkalyq sharalar aıasynda 191 myńnan astam kórneki materıal (paraqshalar, jadynamalar, broshıýralar) taratylyp, sý aıdyndaryna 181 qaýipsizdik belgileri ornatyldy. Sonymen qatar, ákimdikter balalarǵa arnalǵan qaýipsiz jaǵajaılar uıymdastyrýda. Mundaı oryndarda qutqarýshylar balalarǵa júzýdi úıretedi.
Sý aıdyndaryndaǵy qaýipsizdikti baqylaý úshin TJM Ishki ister jáne Kólik mınıstrlikterimen birlese otyryp, 20 myńnan astam reıd jáne patrýl jumystaryn júrgizdi. Nátıjesinde 761 quqyq buzýshy anyqtalyp, QR Ákimshilik quqyq buzýshylyq týraly kodekstiń 364 jáne 412-baptary boıynsha jaýapqa tartyldy.
Qazirgi ýaqytta qutqarý bólimsheleri eń belsendi paıdalanylatyn 70 sý aıdyny ýchaskesinde jumys istep jatyr. Bul jerlerde kásibı qutqarýshylar kezekshilik atqarýda.
Sonymen qatar, jaǵajaı ıeleri men jergilikti ákimdikter mınıstrlikpen birlese otyryp, jedel-qutqarý bólimshelerinde arnaıy daıyndyqtan ótken 100-den astam qoǵamdyq qutqarýshyny daıyndady.
QR TJM barsha azamattardy sýdaǵy qaýipsizdik erejelerin qatań saqtaýǵa shaqyrady.
