Buqalar tústi ajyrata ala ma? Joq. Zertteýlerge súıensek, buqalar qyzyl tústi basqa reńkterden, mysaly, kók ne jasyldan ajyrata almaıdy. Demek, olar qyzyl túske eshqandaı reaksııa tanytpaıdy.
Osy oraıda «olaı bolsa buqany ne ashýlandyrady?» degen zańdy suraq týyndaıdy. Shyndyǵynda, buqa qyzyl mataǵa emes, qozǵalysqa shabýyldaıdy. Matador mýletany (qyzyl matany) bulǵap, belgili bir baǵytta qozǵaltyp, buqanyń nazaryn soǵan aýdarady. Sol sátte janýar qozǵalyp turǵan nársege nazar salady ári qorǵaný nemese shabýyldaý ınstınkti iske qosylady. Bul – minez-qulyq bıologııasynda jıi kezdesetin reaksııa.
Endi kókeıińizde «Onda nelikten dál qyzyl tús tańdalady?» degen suraq týyndaýy múmkin. Aıtaıyq. Qyzyl mata – tek dástúr men kórkemdik sheshim úshin tańdalǵan. Buqanyń denesinen jaraqat alǵan soń aǵyp jatqan qan kórermenge tym aıqyn kórinbeýi úshin qyzyl tús qoldanylǵan. Iаǵnı, bul – kórinistiń vızýaldy áserin jumsartý tásili. Qan mýletaǵa juqsa da, ol kórinbeıdi, sol arqyly shoý jalǵasady, al kórermen emosııalyq turǵyda az soqqy alady. Sonymen qatar, qyzyl tús adamnyń nazaryn eriksiz aýdaratyn reńk bolǵandyqtan, kórermen nazary da matador men mýletaǵa aýady. Demek, tús janýar úshin emes, adam úshin mańyzdy.
