CodiPlay: balalarǵa arnalǵan baǵdarlamalaý álemi
CodiPlay ekojúıesi mektep oqýshylaryn oıyn jáne tájirıbe arqyly sıfrlyq daǵdylarǵa baýlıdy. Bul platforma arqyly olar 2021 jyldan beri «aqyldy úıler», drondar men IoT qurylǵylaryn jasap, C++, Scratch jáne Python tilderinde baǵdarlamalaý negizin meńgerip keledi. CodiKit robototehnıka jınaqtary men muǵalimderge arnalǵan CodiTeach platformasy da júıege engen. Búginde joba Qazaqstan, О́zbekstan, Ázerbaıjan, Ońtústik Koreıa, Ulybrıtanııa, Indonezııa, Saýd Arabııasy men Qatarda keńinen qoldanylady. 2023 jyly CodiPlay BUU qoldaýymen jumys isteıtin Digital Public Goods Alliance tarapynan sıfrlyq qoǵamdyq ıgilik retinde tanyldy.
BeyimTech: jasandy ıntellekt kómegimen beıimdelgen bilim
Jasandy ıntellektke negizdelgen BeyimTech ekojúıesi ár balaǵa jeke oqý traektorııasyn usyný arqyly bilimdi daralandyrýdy maqsat etedi. Alǵashynda zertteý jobasy retinde bastalǵan bastama búginde Nazarbaev Zııatkerlik mektepterimen birlesip jumys isteıtin aýqymdy sheshimge aınaldy. Startaptyń Beyim.ai jáne Beyim Synaq ónimderi oqýshynyń qabiletin saralap, muǵalimmen birlese otyryp beıimdelgen bilim berýge múmkindik beredi. 2024 jyly komanda AQSh-taǵy Hero Training baıqaýynda jeńiske jetip, Draper University úzdik komandasy atandy.
Qalan: matematıka – ońaı ári qyzyqty
Qalan – matematıka pánin meńgerýdi jeńil ári júıeli etetin onlaın-platforma. Munda 40 000-nan astam túsindirý materıaly, 1 000 vıdeodáris, jasandy ıntellekt pen mentorlyq qoldaý bar. Júıe qazaq, orys jáne ózbek tilderinde jumys isteıdi. Platforma Qazaqstan, О́zbekstan men Reseıde qoldanylyp, jasóspirimderdiń este saqtaý qabileti men logıkalyq oılaýyn damytýǵa septigin tıgizip otyr.
Big Dream Lab: vırtýaldy zerthana – naqty bilim
Big Dream Lab kompanııasy oqytýdy vızýaldy ári qaýipsiz etý maqsatynda keńeıtilgen jáne vırtýaldy shyndyq tehnologııalaryn paıdalanady. Olardyń Digital Lab platformasy fızıka, hımııa, bıologııa pánderi boıynsha ınteraktıvti zerthanalar usynady. Platforma qazaq, orys jáne aǵylshyn tilderinde qoljetimdi. Sondaı-aq startap qaýipsizdik boıynsha trenajerler (órt sóndirý, alǵashqy kómek, bıikte jumys) men jumysshy mamandyqtarǵa arnalǵan VR-oqytý quraldaryn ázirleıdi.
BILIMLAND: sıfrlyq bilimniń kóshbasshysy
2011 jyldan beri jumys isteıtin BILIMLAND ekojúıesi – Qazaqstandaǵy eń iri EdTech jobalardyń biri. Munda oqýshylar men muǵalimderge arnalǵan vıdeosabaqtar, sımýlıatorlar, trenajerlar men tapsyrmalar jınaqtalǵan. Kontent pedagogıka men tehnologııany biriktiretin kásibı mamandardyń eńbegimen jasalǵan. Bul platforma bilim berý júıesinde sapaly ári qoljetimdi sıfrlyq mazmun usynýǵa baǵyttalǵan.
Memo Magic: sózdik jattaý – endi oıyn túrinde
Cognitio kompanııasynyń ónimi – Memo Magic mobıldi qosymshasy – shet tilderin úırenýge arnalǵan tıimdi qural. Vızýaldy ádis pen oıyn tásilin biriktiretin júıe 14 000-nan astam sózdi qamtıdy. Qosymsha qazaq, aǵylshyn, túrik, ıspan jáne taǵy 11 tilde jumys isteıdi.
Smartestprep: sheteldik bilimge jol ashqan qural
Smartestprep – stýdentter men ýnıversıtetterdi biriktiretin AI negizindegi platforma. Joba oqýshylar men kásibı baǵdar berýshilerge shetelge túsý prosesin ońaılatyp beredi. Búginge deıin 6 500-den astam stýdent $140 mln astam stıpendııa men grant jeńip alǵan. Júıe esse jazýǵa kómek, test tapsyrý, grant izdeý sekildi tolyq quraldardy qamtıdy. Startap Stenfordtyń StartX akseleratorynan ótken Qazaqstandaǵy úshinshi joba bolyp, ASU+GSV Elite 200 tizimine endi.
Zero Education: mektepti basqarýdyń jańa dáýiri
Zero Education – bilim berý uıymdarynyń basqarý júıesin sıfrlandyrýǵa baǵyttalǵan joba. Platformasy CRM, LMS, qarjy, HR, kelisimshart, ata-ana men muǵalim portaly sııaqty ákimshilik prosesterdi biriktiredi. Bul sheshimder mektep jumysyn ońtaılandyryp, sapaly bilimge kóbirek kóńil bólýge jaǵdaı jasaıdy.
