Bakýde shaǵyn fýtboldan Álem kýbogi bastaldy. Oǵan álemniń ár qıyrynan jınalǵan 32 komanda qatysýda. Qazaqstan quramasy F tobyna tústi. Tusaýkeser kezdesýdi Polshaǵa qarsy ótkizgen otandastarymyz oıda-joqta 1:2 esebimen jeńilis taptyq. Endi Bosnııa men Gersegovına jáne AQSh-pen kúsh synasamyz. Ár topta alǵashqy eki oryndy ıelengender 1/8 fınalǵa joldama alady. Pleı-off básekeleri 27 mamyrda bastalady. Odan keıin shırek fınal (29 mamyr), jartylaı fınal (30 mamyr) jáne qola medal men bas júlde (1 maýsym) úshin tartysty tamashalaımyz.
Álem chempıonatynda sátsiz óner kórsetip, óz tobynda sońǵy orynda qalyp qoıǵan Qazaqstannyń shaıbaly hokkeıshileri kelesi jyly birinshi dıvızıonda oınaıdy. Polshada ótetin jarystyń toptyq týrnırinde bizdiń komanda Fransııa, Polsha, Ýkraına, Japonııa jáne Lıtva quramalarymen kúsh synasady.
Túrkistanda trıatlonnan Qazaqstan chempıonaty aıaqtaldy. Erler saıysynda almatylyq Egor Krýpıakov jeńimpaz atansa, shymkenttik Daryn Qonysbaev pen Almaty qalasynyń taǵy bir ókili Aleksandr Ten júldegerler qataryna qosyldy. Áıelderdiń básekesinde Elordadan kelgen Dıana Erjanova altynnan alqa taqty. Almatylyq Darıa Mazýr men astanalyq Aıda Kım ekinshi jáne úshinshi oryndardy enshiledi.
«Alash Praıd» promoýsheniniń muryndyq bolýymen 27 mamyrda Astanada jalaýy jelbireıtin dúbirli jarysta qazaqtyń ataqty aralas jekpe-jek sheberi, kezindegi ONE Championship uıymynyń altyn belbeýi ıegeri Qaırat Ahmetov (24-3) jeńil salmaqtaǵy UFC-diń eks-chempıony, amerıkalyq Aldjameın Sterlıngpen kúsh synasady. Qos sańlaq grepplıngtiń erejesi boıynsha aıqasady.
