SIM ókiliniń aıtýynsha, otandyq naryqqa qyzyǵýshylyq tanytyp otyrǵandar qatarynda Mars, Pepsi sııaqty kompanııalar bar. Amerıkalyq Mars kompanııasy iri jobada jumys istep jatsa, Pepsi 160 mıllıon dollar ınvestısııa týraly málimdep, óndiristi úsh esege arttyrý úshin osy somadan 2,5 ese kóp qarajat quımaq. Sonymen qatar arab, qytaı jáne túrik kásiporyndary ınvestısııa salýǵa múddeli. Qazirdiń ózinde óndiris aýqymyn odan ári keńeıtýdi kózdeıtinder de, jańadan ashylyp jatqandary da bar. Jaqynda elimizde áıgili brıtandyq-shvedtik farmasevtıkalyq kompanııa óz jumysyn bastaıdy.
«Halyqaralyq AstraZeneca kompanııasynyń óndiristik jelisi iske qosylady. Olar qaterli isik aýrýlaryn emdeýge qoldanylatyn dári-dármekti shyǵarýmen aınalysatyn bolady. Jýyrda Ulybrıtanııaǵa jasaǵan saparymyzda kompanııanyń Kembrıjdegi keńsesinde bolyp, bul jobaǵa asa den qoıylyp otyrǵanyn baıqadyq. Sol sekildi farmasevtıka salasynda Pfizer, Polpharma kompanııalaryn atap ótýge bolady», dedi ol.
Syrtqy ister mınıstriniń orynbasary álemdik brendterdiń ken óńdeý salasyna da enip jatqanyn aıtty. Tanymal bıznes IT, jer qoınaýyn paıdalaný salalaryna da nazaryn tigip otyr. Mysaly, qytaılyq Fufeng kompanııasy Jambyl oblysynda júgerini tereń óńdeýmen aınalysady. Olar jumys oryndaryn quryp, salyq tóleıdi, aradaǵy sharttarǵa sáıkes úzdik tehnologııalarymen bólisedi. Bastysy, álemdik brendterdiń korporatıvtik saıasaty – jergilikti óndiristi barynsha damytý, óz taýar óndirýshilerimizdiń zattaryn tutynyp, qyzmetterin paıdalaný bolýǵa tıis.
