Foto: gov.kz
Baǵdarlama arqyly memlekettik qyzmettiń tıimdiligin arttyrý úshin JI quraldaryn jumys úderisterine engizý kózdelgen.
«AI Qyzmet — sıfrlyq memlekettik basqarýdy qalyptastyrý jolyndaǵy mańyzdy qadam. Bul bastamany iske qosý arqyly biz memlekettik sektor qyzmetkerleriniń jasandy ıntellekt týraly tek qana habardar bolýyn emes, ony kúndelikti jumysynda tıimdi qoldana bilýin maqsat etemiz. Bul memlekettik qyzmetterdiń sapasyn arttyryp, sheshim qabyldaý úderisterin jedeldetýge múmkindik beredi. Qazaqstan memlekettik basqarýǵa jasandy ıntellektti engizýde óńirdegi alǵashqy elderdiń birine aınalyp jatyr», dedi Sıfrlyq damý, ınnovasııalar jáne aeroǵarysh ónerkásibi mınıstri Jaslan Mádıev.
Oqytý aıasynda memlekettik qyzmetkerlerdiń jumysynda jasandy ıntellektini sanaly túrde qoldaný daǵdysyn qalyptastyrý, ákimshilik úderisterdi avtomattandyrý men derekterdi taldaý arqyly ońtaılandyrý, sondaı-aq Qazaqstandaǵy jergilikti AI-sheshimderin (ulttyq jasandy ıntellekt platformasy men qazaq tilindegi úlken tildik modeldi qosa alǵanda) engizý arqyly jumys ónimdiligin arttyrý jáne sheshim qabyldaý sapasyn jaqsartý josparlanyp jatyr.
Kýrs memlekettik qyzmetkerdiń kúndelikti qyzmetindegi JI-di qoldaný, josparlaý, aqparatty óńdeý, prezentasııalar jasaý, sheshim qabyldaý, tapsyrmalardy avtomattandyrý jáne kópshilik aldynda sóz sóıleý syndy daǵdylardy meńgertýge baǵyttalady. Bul kýrsta zamanaýı tildik modeldermen jumys isteýdiń ámbebap qaǵıdalary usynylady, olar jasandy ıntellektiniń ártúrli júıelerine ońaı beıimdelýge kómektesedi. ChatGPT-men tıimdi jumys isteýdi meńgerý Claude (Anthropic), Gemini (Google), Perplexity, Mistral, Cohere jáne basqa da platformalardy senimdi qoldanýǵa jol ashady.
Oqytý oflaın-formatta Memlekettik basqarý akademııasy men onyń fılıaldarynyń bazasynda ótedi. Mastercard jáne KPMG Kavkaz jáne Ortalyq Azııa kompanııalary kýrsty uıymdastyrýǵa qoldaý kórsetip otyr. Oqytý aıaqtalǵannan keıin memlekettik qyzmetshilerge biregeı nómiri bar sertıfıkattar tabystalady.
Baǵdarlama aıasynda jyl saıyn shamamen 30 000 memlekettik qyzmetkerdi qamtý josparlanǵan. Kýrstyń jazbasy elimizdegi barlyq memlekettik qyzmetkerler úshin Astana Hub platformasynda kez kelgen ýaqytta qoljetimdi bolady.
