Foto: ashyq derkkóz
Baıqaý barysynda Rýdnyıdaǵy tórt birdeı qazaq mektebiniń oqýshylary birtýar jazýshynyń shyǵarmalarynan test tapsyryp, «Apamnyń astaýy» áńgimesi boıynsha esse jazdy.
Nátıjesinde 157 balanyń ishinen eń úzdik dep tanylǵan Uldana Qalanbekova, Aısamal Dosanova, Marjan Nasır, Aısulý Aqylbekova, Nuraı Rahymbaıqyzy tárizdi 5 oqýshy baıqaý jeńimpazy atandy.
Jeńimpaz oqýshylardy marapattaý rásimi Beıimbet Maılın atyndaǵy №7-shi mektepte ótti. Saltanatty jıynǵa Rýdnyı qalasynyń aqsaqaldary, bilim salasynyń ardagerleri, mektep basshylary, muǵalimder, ata-analar qatysty.
Is-shara barysynda qurylys kompanııasynyń ókilderi 5 jeńimpazǵa Qatonqaraǵaıdaǵy «Divergents Camp» lagerine joldama berdi.
«О́tken jyly mamyrda biz Qatonqaraǵaıǵa baryp demalyp qaıtqan edik. Shyńǵystaıǵa soǵyp Oralhan Bókeıdiń úıin kórdik. Sol kezde jazýshynyń shyǵarmalaryn balalarǵa oqytsaq, olardyń osy ózimiz kórgen Shyǵystyń ásem tabıǵatyna boılap, jazǵy demalysyn este qalarlyqtaı qyzyqty da, mazmundy ótkizýine sebepshi bolsaq degen oı týdy. Úsh aıdan keıin «QC Read» jobasyn bastap kettik. Sodan beri 8 baıqaý ótkizippiz. «Oralhan oqýlary» aldymen Mańǵystaý oblysynyń Munaıly aýdanynda boldy. Oǵan 151 oqýshy qatysty. Osy is-shara barysynda joba aıasynda atqarylǵan birjyldyq jumysymyzdy qorytyndyladyq. Atalǵan joba bastalǵaly Mańǵystaý, Qostanaı oblystarynda Beıimbet, Ábish, Tólen, Oralhan, Svetqalı oqýlaryn ótkizdik. Oǵan myńǵa jýyq bala qatysty. Demek, bir jyldyń ishinde osynshama balanyń 50 shyǵarma oqýyna nemese birinshi ret kitap betin ashýyna sebepshi bolyppyz», deıdi kompanııa ókili Almas Altaı.
