Saltanatty jıynǵa áskerı bólimniń jeke quramy men qurmetti qonaqtary – Aqtaý garnızony áskerı bólimderiniń komandırleri, Qarýly kúshterdiń ardagerleri jáne áskerı qyzmetshilerdiń otbasy músheleri qatysty.
Is-shara Jaýyngerlik týdy shyǵarýdan jáne Qazaqstan Respýblıkasynyń Memlekettik Ánuranyn oryndaýdan bastaldy. Komandırdiń birinshi orynbasary – 30153 áskerı bólimi shtabynyń bastyǵy polkovnık Rýslan Smaǵulov quttyqtaý sóz sóıledi.
Ol jeke quramdy ataýly kúnmen quttyqtap, otbasylaryna amandyq pen qyzmette tabys tiledi. Erekshe kózge túsken áskerı qyzmetshilerge gramotalar men baǵaly syılyqtar tabys etildi.
«Bizdiń avıasııalyq bazamyz 2011 jylǵy 25 mamyrda Qorǵanys mınıstriniń dırektıvasy negizinde quryldy. 14 jyl boıy biz batys aımaqtyń áýe shebin qorǵaýda turmyz jáne kóptegen jaýapty mindetterdi oryndaımyz. Bólimniń jeke quramy oqý-jattyǵýlar men qutqarý operasııalaryna belsendi qatysady. Bıyl biz áskerı sherýde bólimniń qyzmetin abyroımen kórsettik», dedi komandırdiń tárbıe jáne ıdeologııalyq jumys jónindegi orynbasary podpolkovnık Rollan Bákirov.
Is-sharany uıymdastyrýshylar qonaqtarǵa qarý-jaraq quramyndaǵy avıasııalyq tehnıkany – joıǵyshtar, tikushaqtar jáne ushqyshsyz basqarylatyn qurylǵylardy kórsetti. Dástúrge saı sporttyq jarystar men kórkemónerpazdar konserti ótti.
