Foto: parlam.kz
Depýtattyń aıtýynsha, usynylyp otyrǵan zań jobasy 2023 jyldyń sáýir aıynan, ıaǵnı Májilistiń 8-shaqyrylym depýtaty bolyp saılanǵan kezden bastap qolǵa alynyp, kúni búginge deıin jalǵasqan.
«Usynylyp otyrǵan zań jobasy 2023 jyldyń sáýir aıynan, ıaǵnı Májilistiń 8-shaqyrylym depýtaty bolyp saılanǵan kezimizden bastap qolǵa alynyp, kúni búginge deıin jalǵasty. Qazirgi ýaqytta qoldanystaǵy Qylmystyq, Qylmystyq-prosestik jáne Qylmystyq-atqarý kodeksteri 2014 jyly qabyldanyp, 2015 jyldyń 1 qańtarynan bastap zańdy kúshine endi. Osy on jyl ishinde QK men QPK-ǵa 100-den astam zań jobasy aıasynda 1000-nan asa túzetýler men tolyqtyrýlar engizildi», dedi depýtat.
Depýtat atap ótkendeı, qylmystyq zańnamanyń mundaı turaqsyzdyǵy qoǵam tarapynan, quqyq qorǵaýshylar men zańgerler, sondaı-aq ǵylymı orta ókilderiniń oryndy synyna ushyraǵan.
«Usynylyp otyrǵan jańa zań jobasy — sońǵy jyldardaǵy eń aýqymdy jáne mazmundyq jaǵynan kúrdeli ózgeristerdi qamtıtyn bastama. Atalǵan qujat arqyly qylmystyq zańnama júıelenip, birizdilikke túsedi jáne zańnamalyq turaqtylyq qamtamasyz etiledi dep esepteımin», dedi Abzal Quspan.
Depýtat Zań jobasy Memleket basshysynyń 2022 jylǵy 1 qyrkúıektegi Joldaýyn iske asyrý jáne 2030 jylǵa deıingi quqyqtyq saıasat tujyrymdamasyn júzege asyrý aıasynda ázirlengenin atap ótti. Aıta keteıik, bul joly qylmystyq zańnamany jetildirý quzyreti alǵash ret Ishki ister jáne prokýratýra salasy emes, ádilet organdaryna berilgen.
Zań jobasynyń negizgi baǵyttary:
- Azamattar men kásipkerlerdiń quqyqtaryn qorǵaýdy kúsheıtý;
- Qylmystyq proseste advokattardyń rólin arttyrý;
- Qylmystyq is júrgizýdi ońtaılandyrý;
- Stalkıng (qorqytý jáne zańsyz qýdalaý) úshin jaýapkershilik engizý;
- Zańsyz túrde bank kartasyn nemese shotty berý úshin qylmystyq jaza;
- Májbúrli neke úshin qylmystyq jaýapkershilik.
«Májiliste ótken bir jyl ishinde 60-tan astam jumys tobynyń otyrysy ótkizilip, 699 depýtattyq túzetý qaraldy. Joba Konstıtýsııalyq Sottyń normatıvtik qaýlylaryn da qamtıdy. Joǵary oqý oryndarynyń professor-oqytýshylar quramy, zań ǵylymdarynyń ardagerleri, halyqaralyq sarapshylar belsendi atsalysty», dedi depýtat.
Abzal Quspan júrgizilgen jumystyń aýqymyn, ǵylymı saraptamanyń tereńdigin jáne normalardyń naqty pysyqtalǵanyn eskere otyryp, zań jobasyn qabyldap, ony Parlament Senatyna joldaýdy usyndy.
