Foto: QR Saýda jáne ıntegrasııa mınıstrligi
QR Saýda jáne ıntegrasııa mınıstrliginiń málimetinshe, joba aıasynda Ekazent Management GmbH kompanııasy aýtlet-ortalyqty ornalastyrýǵa eń qolaıly oryndy anyqtaý úshin keshendi marketıngtik zertteý júrgizedi.
«Kompanııa bolashaq ortalyqtyń arhıtektýralyq jáne operasııalyq tujyrymdamasyn ázirlep, basqarý strategııasyn qalyptastyrady. Nysan iske qosylǵannan keıin kúndelikti operasııalyq basqarý mindetin de óz moınyna alady. Budan bólek, Ekazent halyqaralyq brendter men jalǵa alýshylardy tartý jumystarymen aınalysady», delingen habarlamada.
Aýtlet-ortalyqtyń jalpy aýdany 80 000-nan 120 000 sharshy metrdi quraıdy. Onyń aýmaǵynda iri saýda galereıalary, qonaqúıler, qoǵamdyq tamaqtaný oryndary, balalar oıyn alańdary jáne basqa da qajetti ınfraqurylym nysandary ornalasady.
Qazaqstannyń Saýda jáne ıntegrasııa mınıstri Arman Shaqqalıevtiń aıtýynsha, bul joba bólshek saýda salasyna jańa serpin berip, elimizge erekshe básekelestik artyqshylyq ákeledi. Qazirgi tańda Ortalyq Azııada batystyq úlgidegi aýtlet-ortalyqtar joq..
«Bul jobanyń iske asyrylýy Qazaqstannyń bólshek saýda salasyna jańa serpin beredi. Qazirgi tańda Ortalyq Azııada batystyq úlgidegi aýtlet-ortalyqtar joq, bul – elimiz úshin erekshe básekelestik artyqshylyq. Qazaqstandyq tutynýshylar brendtik taýarlarǵa erekshe qyzyǵýshylyq tanytyp, sán men lifestyle mádenıetin joǵary baǵalaıdy. Sonymen qatar, Almaty oblysynyń О́zbekstan men Qyrǵyzstan astanalaryna jaqyn ornalasýy, Qytaı, Túrkııa, BAÁ jáne Reseı baǵytyndaǵy logıstıkalyq dálizderdiń qıylysynda ornalasýy óńirdiń kólik-logıstıkalyq áleýetin arttyrady», dedi mınıstr.
Joba seriktesi, The College Group kompanııasynyń operasııalyq dırektory Ýıll Kıffer Qazaqstandy bólshek saýda men týrızm turǵysynan Ortalyq Azııadaǵy eń áleýetti óńir retinde ataǵan.
«Qazaqstan, ásirese Astana men Almaty qalalary – Ortalyq Azııadaǵy eń qyzyqty aımaqtardyń biri. Biz Avstrııamen senimdi seriktestik ornatyp, bul jobany aldaǵy eki jyl ishinde tolyq aıaqtaımyz dep josparlap otyrmyz», dedi ol.
Qazirgi tańda jahandyq aýtlet-rıteıl naryǵynyń kólemi 100 mıllıard AQSh dollarynan asyp, jyl saıyn 5–7 paıyz qarqynmen ósip keledi. Bul úrdis Azııa elderinde aıryqsha baıqalyp keledi. Joba QSM tobyna qarasty Multibrand Holding kompanııasy arqyly júzege asyrylady. Holdıng quramyna elimizdegi alǵashqy CFBO (Centralized Fulfillment by Operator) modelinde jumys isteıtin marketpleıs TEEZ, onlaın-gıpermarket Clever, jáne FMCG ónimderiniń dıstrıbıýtory Clever Distribution kiredi. Sıfrlyq logıstıka men halyqaralyq developerlik tájirıbeniń úılesýi bul jobanyń tabysty bolýyna úlken múmkindik beredi.
