Foto: Ashyq derekkóz
Is-shara bastalmas buryn qurmetti qonaq ýnıversıtet mýzeıine arnaıy baryp, oqý ornynyń tarıhı damýy men jetistikterimen tanysty.
Kezdesý aıasynda professordyń «Qazaqtyń Qonaevy» jáne «Otyz jyldyń oı-tolǵaýy» atty jańa kitaptarynyń tusaýkeser rásimi ótti. Jańa týyndyda avtor ózi kýá bolǵan estelikterdi baıandap, keńestik tustaǵy ádiletsizdikter men qaıshylyqtar týraly tolǵamdy oılarymen bólisken. Al «Qazaqtyń Qonaevy» – ultymyzdyń dara perzenti Dinmuhamed Qonaevtyń uzaq jyldar ult múddesine saı atqarǵan qaıratkerlik eńbegine arnalǵan.
Is-sharanyń maqsaty – jastardy el tarıhyndaǵy kórnekti tulǵalardyń ómir jolymen tanystyrý, ulttyq sana men tarıhı jadyny jańǵyrtý, sondaı-aq azamattyq ustanym men oı erkindigin damytý boldy.
Is-sharaǵa Abaı atyndaǵy QazUPÝ Basqarma tóraǵasy-rektor Bolat Tilep, aqyn, dramatýrg, memleket jáne qoǵam qaıratkeri Nurlan Orazalın, ýnıversıtet basshylyǵy, professorlyq-oqytýshylyq quramy men jas ǵalymdar qatysty.
Rektor Bolat Tilep quttyqtaý sózinde Qýanysh Sultanovtyń memleketimiz ben ǵylym salasyna qosqan úlesin erekshe atap ótip, ony jas urpaq úshin taǵylym mektebi dep baǵalady.
«Qýanysh Sultanov – el tarıhynyń bel ortasynda júrgen, san túrli kezeńderde halyq múddesin joǵary qoıǵan, oıy tereń, sózi salıqaly qaıratker. Onyń eńbekteri – óskeleń urpaq úshin taǵylym mektebi. Búgingi tusaýy kesilgen kitaptary – táýelsizdik shejiresiniń mańyzdy paraqtary retinde el jadynda saqtalady dep senemin», – dedi rektor.
Al kezdesý barysynda Qýanysh Sultanov táýelsizdiktiń tarıhı mańyzy, ulttyq sana men patrıottyq tárbıeniń máni jaıly keńinen toqtalyp, Dinmuhamed Qonaev tulǵasy arqyly ult kóshbasshysynyń beınesin sıpattaıtyn tustarǵa nazar aýdardy. Sonymen qatar, sońǵy otyz jyldaǵy saıası-áleýmettik ózgeristerge qatysty óziniń avtorlyq kózqarasyn ortaǵa saldy.
Kezdesý aıasynda qatysýshylar qatysýshylar avtor kótergen ózekti taqyryptardy keńinen talqylap, qoǵam damýyna qatysty oı-pikirlerimen bólisti.
Kesh sońynda professor Qýanysh Sultanovqa Abaı ýnıversıtetiniń eń joǵary marapattarynyń biri – Abaı medali tabystalyp, ulttyq dástúrge saı qurmetti qonaqqa shapan jabyldy. Bul syı-qurmet – memleket jáne qoǵam qaıratkeri Qýanysh Sultanovtyń ǵylym men qoǵam damýyna qosqan súbeli úlesine degen joǵary baǵanyń belgisi boldy.
Alına QAIRATQYZY,
EUÝ 2-kýrs stýdenti
