Bul qylmysty jasaǵandar oblystyq máslıhattyń burynǵy depýtaty, «Petropavlda sý tazalaý, tartý jáne ótkizý» MKK dırektory Pavel Býlaev bastaǵan top. Ol óziniń baǵynysyndaǵy D.Marshalov, L.Shakshakbaev jáne R.Iаkovenkomen birlesip, jalǵan kompanııalar tirkep, olarǵa kásiporynǵa qajetti túrli jumystardy atqardy dep 2020 men 2022 jyl aralyǵynda bıýdjet qarajatyn aýdaryp otyrǵan.
Is júzinde bul jumystardy memlekettik kásiporynnyń ózi atqarǵan. Al qylmyskerlerdiń jalǵan kásiporyndarynda eshqandaı adam kúshi de tehnıka da bolmaǵan.
Qylmystyq is sotta alty aı boıy qaralyp, júzdegen kýágerlerden jaýap alyndy. Aqyrynda sot P.Býlaevty – 8 jylǵa, qalǵandaryn 7,5 jyldan bas erkinen aıyrý týraly úkim shyǵardy. Sottalǵandardan memleket esebine 805 mln teńge óndirip alyndy jáne qylmystyq áreketpen tapqan múlikteri tárkilendi.
PETROPAVL
