«On...toǵyz...segiz...jeti...» dep bastalatyn bul rásim búginde ǵarysh saparynyń qalyptasqan dástúrine aınaldy. Taǵatyńdy taýysyp, dymyńdy qurtatyn osy bir tásil alǵash ret 1929 jyly shyqqan nemistiń «Aıdaǵy áıel» («Frau im Mond») atty ǵylymı-fantastıkalyq fılminde qoldanylǵan. Kórermenniń qobaljýyn kúsheıtetin bul ádis, árıne, sol kez úshin tosyn ári áserli jańalyq edi. Keıin dál osy effekt naqty ǵarysh salasynda da kórinis tapty. Minekı, bul – kıno óneriniń ǵylymǵa jasaǵan ǵajaıyp yqpalynyń bir mysaly.
