Sýret: mnu.kz
Zań jobasy Memlekettik qyzmetti damytýdyń 2024–2029 jyldarǵa arnalǵan tujyrymdamasyn iske asyrý aıasynda ázirlengen. Qujatta jasandy ıntellekt múmkindikterin qoldaný, memlekettik qyzmetkerler úshin kóldeneńnen ósý múmkindikterin engizý syndy ózgerister bar. Basqosýda agenttik tóraǵasy zań jobasynda memlekettik qyzmettiń mıssııasy, mindetteri men talaptary da jańasha aıqyndalǵanyn atap ótti.
– Memleket basshysynyń «adam memleket úshin emes, memleket adam úshin» degen irgeli qaǵıdasy memlekettik apparattyń jumysyn ashyq, adamǵa baǵdarlanǵan sıpatta ilgeriletýdi kózdeıdi. Jańa zań jobasynda otansúıgishtik, ashyqtyq pen kásibılik, klıentke baǵdarlaný men quqyq buzýshylyqqa tózbeýshilikti qamtıtyn talaptardy zańnamalyq turǵyda bekitý josparlanyp otyr, – dedi D.Jazyqbaı.
Sondaı-aq qujatta memlekettik qyzmetshilerdiń memlekettik jáne qoǵamdyq múddelerge adaldyǵyn qamtamasyz etýge baǵyttalǵan minsiz bedel ınstıtýtyn engizý qarastyrylǵan. Odan bólek, bılik tarmaǵynda qyzmet etetin azamattarǵa memleket pen qoǵamnyń múddelerin qorǵaý qajettiligi týyndaǵan jaǵdaıda jaýapkershilikten jáne bıýrokratııadan qaımyqpaı basqarýshylyq sheshimder qabyldaýǵa múmkindik beretin normalar engizilgen.
Taǵy bir ózgeris – ishki konkýrstardy joıý. Memlekettik qyzmet isteri agenttigi tóraǵasynyń orynbasary Salaýat Múksimovtiń aıtýynsha, bul kadrlyq irikteý múmkindigin keńeıtip, memlekettik qyzmetke bilikti mamandardy tartýǵa jol ashady.
– Japonııa men Sıngapýr tájirıbesine súıenip, jastardy memlekettik organdarǵa tartý maqsatynda mektep jáne ýnıversıtet deńgeıin qamtıtyn erte kásiptik baǵdarlaý ınstıtýty qurylady. Bastama daryndy jastardy mektep jasynan bastap memlekettik qyzmetke yntalandyrýǵa múmkindik beredi. Jalpy, bul zań jobasy memlekettik qyzmettiń mánin, onyń basty maqsattaryn jáne azamattardyń qoǵam aldyndaǵy jaýapkershiligin aıqyndaıdy. Qujat tek eńbek jáne quqyqtyq qatynastardy emes, sondaı-aq memlekettik apparat pen qoǵam jáne azamat arasyndaǵy ózara baılanysty retteýge baǵyttalǵan, – dedi ol.
Dóńgelek ústel jıynyna qatysýshylardyń pikirinshe, usynylyp otyrǵan zańnamalyq sharalar memlekettik apparattyń tıimdi qyzmet etýine, sondaı-aq memlekettik organdardyń qyzmetine qoǵam seniminiń artýyna yqpal etedi. Is-shara qorytyndysynda sarapshylar zań jobasyna qatysty usynys-pikirlerin ortaǵa salyp, ǵylymı-saraptamalyq qoldaý kórsetýge daıyn ekenin jetkizdi.
