Mazmundy jıynnyń ashylýynda NU prezıdenti, professor Vakar Ahmad klımattyń ózgerýi men qorshaǵan ortanyń degradasııasy aıasynda turaqty energetıkalyq sheshimder óte mańyzdy ekenin jetkizdi.
«Jańartylatyn energııa kózderi salasyndaǵy bilim men zertteýler — negizgi mindetimizdiń bir bóligi. Sondyqtan biz kún, jel jáne taza energııanyń basqa da túrleri salasynda ınnovasııalyq tehnologııany ázirleıtin bolashaq kóshbasshylardy daıarlap jatyrmyz», dedi ol.
Sımpozıýmda ǵalymdardyń 46-dan astam baıandamasy tyńdaldy. Onda kún batareıalary, bıomassa, sýtekti óndirý jáne saqtaý, kvanttyq qosymshalarǵa arnalǵan topologııalyq materıaldar týraly sóz boldy. Sonymen qatar is-shara aıasynda qonaqtarǵa otandyq ǵalymdardyń osy saladaǵy ǵylymı ázirlemeleri usynyldy. Ásirese olardy NU janyndaǵy Jańartylatyn energııa kózderi zerthanasy ǵalymdary daıyndaǵan ıkemdi elektronıka men bıosensorlarǵa arnalǵan keýekti polımerler erekshe qyzyqtyrdy. Bul materıal deformasııaǵa tózimdi ári kıiletin qurylǵylardyń tıimdiligin arttyrady. Sondaı-aq bıomassa materıalymen jumys isteıtin toptyń aǵa ǵylymı qyzmetkeri M.Shaımardannyń jetekshiligimen jasalǵan fýrfýral (júgeri qulaqtarynan alynǵan organıkalyq qosyndy) negizindegi gıpertonııaǵa qarsy dári de usynyldy. Fýrfýral AQSh Energetıka mınıstrliginiń nusqasy boıynsha eń perspektıvaly bıozattardyń biri sanalady.
Bir jaǵynan, NU janyndaǵy Jańartylatyn energııa kózderi zerthanasynyń basshysy, professor Nurshat Nurajynyń aıtýynsha, mundaı jıyn ǵalymdardyń bir-birimen tájirıbe almasyp, birlesken zertteýlerdi damytýǵa paıdasy mol.
Al Batys Shotlandııa ýnıversıtetiniń professory Modjtaba Mırzaeıan bizdiń el ǵylymynyń belsendi damýyna tánti bolǵanyn jetkizdi.
«Qazaqstannan kelgen talantty stýdentter Shotlandııa jáne Oksfordtaǵy zerthanamda taǵylymdamadan ótip, úzdik nátıjeler kórsetti», dedi ol.
Qysqasy, sımpozıým NU-dyń óńirlik ǵylymı hab retindegi ornyn nyǵaıta túskenin taǵy bir dáleldedi.
