Jaqynda elordada qazaq-fransýz mektebiniń kapsýlasyn qalaý boıynsha saltanatty rásim ótti. Oǵan Oqý-aǵartý mınıstri Ǵanı Beısembaev, Fransııanyń Syrtqy saýda jáne shetelde turatyn fransýz azamattary jónindegi mınıstr-delegaty Loran Sen-Marten qatysty.
Internaty bar mektep 800 orynǵa eseptelgen jáne elimizdiń memlekettik jalpyǵa mindetti bilim berý standartyna sáıkestendirilgen. Atalǵan mektepte barlyq óńirdiń balalary bilim alady.
Qatysýshylarǵa arnaǵan sózinde mınıstr Ǵ.Beısembaev jobanyń bilim berý salasyndaǵy basty oqıǵalardyń birine aınalatynyn atap ótti.
«Bul – Qazaqstan men Fransııa arasyndaǵy bilim berý salasyndaǵy tereńdetilgen yntymaqtastyqtyń sımvoly. Osy mektep arhıtektýralyq jáne bilim berý turǵysynan úlgi bolyp, bizdiń elderimiz arasyndaǵy naǵyz kópirge aınalady dep senemiz», dedi mınıstr.
Ortalyq Azııadaǵy halyqaralyq deńgeıdegi negizgi bilim berý uıymdarynyń birine aınalatyn bolashaq mektep 2026 jyldyń 1 qyrkúıeginde óz esigin ashady dep josparlanǵan. Sonymen qatar Almaty qalasynda qazaq-fransýz mektebi ashylady.
