Osy oraıda árbir óndirýshi, otandyq nemese sheteldik ekendigine qaramastan, dári qaptamasyna tańbalaý kodyn aldyn ala engizedi. QR zańnamasy tańbalaýǵa qatysatyn rezıdent emes kompanııalarǵa Qazaqstanǵa kelmeı-aq, óz elinde JSN alý múmkindigin qarastyrady. Sonymen qatar kompanııa basshysynyń senimhaty negizinde BSN rásimdeý múmkindigi de bar.
JSN negizinde sheteldik óndirýshige ESQ beriledi. Dárilik zattardy tańbalaý jobasynyń jetekshisi Anar Káribaevanyń aıtýynsha, bul sheteldik kompanııalarǵa Biryńǵaı tańbalaý jáne qadaǵalaý operatorynyń aqparattyq júıesinde otandyq óndirýshilermen teń dárejede jumys isteýge múmkindik beredi.
«Júıege qosylǵannan keıin sheteldik óndirýshiler tańbalaý kodtaryn tapsyrys berip, olardy dári-dármek qaptamasyna óndiristik kezeńde engizip, Qazaqstanǵa daıyn, ıaǵnı tańbalanǵan kúıde eksporttaıdy. Sonymen qatar, zańnamada shetelden kelgen dári-dármekterdi Qazaqstan aýmaǵynda tańbalaý múmkindigi de qarastyrylǵan. Bul jaǵdaıda qaptamalar tańbalaýdy barlyq talaptardy saqtaı otyryp, otandyq dıstrıbıýtorlar júzege asyrady», dedi Anar Káribaeva.
Esterińizge sala keteıik, dárilik zattardy mindetti tańbalaý júıesi Qazaqstan Respýblıkasynda 2024 jylǵy 1 shildeden bastap qoldanysqa engizildi. Bul shara naryqtyń ashyqtyǵyn arttyrýǵa, jalǵan dárilermen kúresýge jáne azamattardyń densaýlyǵyn qorǵaýǵa baǵyttalǵan.
