Bıyl besinshi márte uıymdastyrylyp otyrǵan bul týrnırdiń ashylý sátinde Batyrjan Hasenovtiń týystary, dostary jáne áriptesteri sóz sóılep, onyń adamı bolmysy men qoǵamǵa sińirgen eńbegi týraly tebirene eske aldy.
«Batyrjan – alty balanyń kenjesi bolǵanymen, bárimizdiń úlkenimiz sııaqty edi. Úlkenge de, kishige de únemi qamqor bolyp júretin. Onyń esimi tek otbasynda ǵana emes, dostary men shákirtteriniń júreginde máńgi saqtalady. Bıyl besinshi ret ótkizilip otyrǵan osy týrnır – sonyń aıqyn dáleli. Bul saıysty uıymdastyrýshylar – Batyrjannyń dostary. Biz – otbasy músheleri de shet qalmaı, júlde qoryna úlesimizdi qosyp kelemiz. Alǵashynda osy jasyl alańdaǵy jarys tek eresekter arasynda ótetin. Minekı, bıyl tuńǵysh ret balalar arasynda uıymdastyrylyp otyr. Bálkim, bul da beker emes shyǵar. О́ıtkeni Batyrjan óte balajan bolatyn. Kishkentaı fýtbolshylardy janyn salyp jattyqtyratyn, tek sportqa qana emes, ómirge baýlyp, aǵalyq aqyl keńesin aıtyp júretin», dedi Batyrjannyń ápkesi Gúlnar Seıdahmetqyzy.
Jarysqa elordanyń túrli sport mektepteri men fýtbol ortalyqtarynan 2017 jyly jáne odan keıin dúnıege kelgen balalardan quralǵan 8 komanda qatysty. Olar kóktemnen beri daıyndalyp, bul týrnırdi asyǵa kútken. Balalardyń kózindegi jalyn, alańǵa shyqqandaǵy senimdi júris – bári bul jarystyń olar úshin qanshalyqty mańyzdy ekenin ańǵartty.
Týrnırdiń basty ereksheligi – munda tek jarysý ǵana emes, ómirden ótken azamatty urpaq jadynda saqtaý, jas oıynshylardyń júregine úlgi bolar tulǵany tanytý kózdeldi.
Jarys sońynda Jeńimpazdarǵa dıplomdar, kýboktar men baǵaly syılyqtar tabystaldy.
