Foto: Abdýlkarım Qaraman
Abdýlkarım Dáribaıuly 1994 jyly Qaraǵandy oblysynyń Shet aýdanyna qarasty Aqadyr kentinde dúnıege keldi. Paýerlıftıngpen 12 jasynan bastap shuǵyldana bastaıdy. 13 jasynda alǵash ret oblystyq jarysta jeńiske jetken ol respýblıkalyq jarysqa joldama alyp, sol jarysta 5-shi oryn alǵan. Al 14 jasynda alǵash ret respýblıkalyq jarysta jeńis tuǵyrynan kórindi.
Sportshynyń paýerlıftıngpen shuǵyldanýyna aǵasy men ákesi sebepker bolǵan. Aqadyr kentinde turyp jatqan Ospanovtar otbasyn – sportshylar áýleti dese de bolady. Aǵasy Almaz jáne baýyry Aıtas birneshe ret Álem jáne Azııa chempıondary atanǵan. Al qurylys pen temir jol salasynda eńbek etip, sporttyń bul túrine 50-den asqan shaǵynda kelgen ákesi Dáribaı Ospanov aqsaqal Azııanyn 10 dúrkin, Álemniń 5 dúrkin chempıony.
Abdýlkarım Dáribaıuly respýblıkalyq jarystarda 24 ret top jarǵan. Azııa dodalarynda 6 márte altyn medal jeńip alǵan. Jahandyq jarystardyń 7 márte kúmis júldegeri jáne 7 dúrkin chempıony. Aıta ketken jón, Abdýlkárim Qaraman sport sheberi ataǵyn 15 jasynda oryndady, al 17 jasynda «Halyqaralyq sport sheberi» ataǵyn ıelendi. Ol paýerlıftıng sport túrinen qazaqtan shyqqan tuńǵysh «Halyqaralyq dárejedegi eńbek sińirgen sport sheberi» ataǵynyń ıegeri. Álemniń rekordyn 5 ret jańartty. Paýerlıftıngshilerdiń búkilálemdik reıtıngterinde eki túrinen de 4 orynǵa shyǵyp, úzdik 5-tikke endi.
2009 jyly Úndistanda alǵash ret Azııa chempıony atanǵan jas shaǵynan beri ol dúnıejúziniń túkpir-túkpir elderin kórip, talaı jarystarda top jaryp, elimizdiń atyn asqaqtatty.
«2017 jyly sáýir aıynda AQSh-tyń Kıllın qalasynda (Tehas shtaty) eresekter arasynda paýerlıftıngtiń jatyp syǵymdap kóterý (klassıkalyq) túri boıynsha álem chempıonatynda qazaq ultynan shyqqan tunǵysh álem chempıony atanǵan mezettegi sezimderdi sózben jetkizý múmkin emes, elimizdiń Ánurany oınaǵanda kózimnen jas parlady», deıdi Abdýlkarım Qaraman.
Sportshy qazirgi ýaqytta da 13 myń turǵyny bar týǵan jeri Aqadyr kentinde turady, sol iri kentte eki bapker, ıaǵnı ákesi Dáribaı Ospanov aqsaqal ekeýi jattyqtyrýshy bolyp jumys isteıdi. Ákeli-balaly sportshylardyń shákirtteriniń de jetistikteri aıtarlyqtaı. Shákirtteri Marǵulan Beken, Janat Satybaldy, Azat Zeınedılov – Azııa chempıondary, al Anton Marchenko esimdi shákirti Álemniń úsh dúrkin, Azııanyn úsh márte chempıony atanǵan. Odan bólek, onnan astam sport sheberi, elýden astam QR-nyń chempıondary, jetpisten astam sport sheberine úmitker shákirtteri bar.
«Qarajat bólinetindikten jarystardyń barlyǵyna barýǵa múmkindigimiz bar. Biraq, jastarǵa stıpendııa tóleýge jáne sborga shyǵýǵa múmkindik bolmaı jatyr jáne Aqadyr kentinde sportzal salý máselesi áli sheshimin tappady, nebári 90 kvadrat metr jerde ǵana jattyǵý jasap jatyrmyz», deıdi ol.
Paýerlıftıng – sporttyń eń aýyr túri. Olaı deıtinimiz, ár paýerlıftıngishi orta eseppen aptasyna 5 ret jattyǵýǵa qatysyp, ár jattyǵý saıyn ziltemirdi 20 tonna kótergende jylyna 5 000 tonna kóteredi eken. Sondyqtan olar vıtamınderge toly sapaly tamaqtardy jeıdi ári dıeta ustanady.
«Sodan da bolar, paýerlıftıngpen jigeri jetkender ǵana aınalysady. О́kinishke oraı, bul sport túri jabylady degen áńgime bar, men buǵan múlde kelispeımin. Qazaqstannyń paýerlıftıngi búkil álemge áıgili. Basqa jetistikterdi aıtpaǵanda, bıyl Qazaqstan quramasy eresekter arasynda 54 eldiń sportshylary arasynda top jardy. Jaqsy damyǵan sport túrleri jabylýǵa laıyqty emes», deıdi Abdýlkarım Dáribaıuly.
