Festıval 6 maýsymda Aqsýat mádenıet úıinde ASSYLTAS teatrynyń «Meni taýyp alshy» qoıylymymen bastaldy. Jaqynda ǵana Almatyda premerasy ótken drama jetimderdiń taǵdyry men anaǵa degen máńgilik saǵynyshty sýrettep, qoǵamdaǵy máseleler týrasynda oı qozǵaıdy. Budan soń uıymdastyrýshylar jyldaǵy úrdisti jalǵap, Orta júzge belgili halyq emshisi, XVIII ǵasyrda ómir súrgen áýlıe Yrǵyzbaı ata kesenesinde qurbandyq shalynyp, as berdi.
7 maýsymda Aqsýattyń ortalyq alańynda Assyl Arlan týrnıri bastaldy. 74 kelige deıingi salmaqta 24 balýan, al +74 kelide (Túıe balýan) 18 balýan baq synasty. Festıvaldiń resmı ashylý saltanaty da is-sharanyń ekinshi kúnine josparlanypty. Aqsýatqa arnaıy jumys saparymen barǵan Abaı oblysynyń ákimi Berik Ýálı saltanatty jıynnyń ashylýyna qatysyp, festıvalde sport men ónerdiń úılesimimen qatar el birligi men týǵan jerge janashyrlyqtyń kórinis tapqanyn jetkizdi.
– Abaı elinde týǵan jerge qyzmet etý, jomarttyq pen eldik rýh qashanda bıik baǵalanǵan. Osy jolda erekshe eńbek etip júrgen azamattardyń biri – kásipker Dýlat Tastekeev. Onyń elge degen súıispenshiligi tek sózben emes, naqty ispen dáleldenip keledi. Bul – týǵan jerin súıgen azamattyń jarqyn úlgisi. Aýyl – ulttyń altyn dińgegi. Osy oraıda ár azamatty óńirimizdi, ásirese shalǵaı aýyldardy damytýǵa shaqyramyn, – dep aımaq basshysy týǵan jerge qyzmet etip júrgen azamattarǵa da alǵysyn jetkize kele, 19-20 maýsymda ótetin «Týǵan jerge týyńdy tik» ınvestısııalyq forýmyna óńirdiń qamyn oılaǵan barsha azamatty shaqyrdy. Aımaq basyshsy basqosýda oblystaǵy atqarylyp jatqan jobalar jaıynda da aıta ketti.
– Oblys ákimi retinde jumysqa kiriskeli beri Aqsýat aýdanyna ekinshi ret kelip otyrmyn. Alǵash kelgende ózekti máselelermen tanysyp, aýdannyń qajettilikterin jazyp alyp, sessııanyń qaraýyna engizgen bolatynmyn. Sonyń nátıjesinde bıyl Aqsýat aýylyna kire beris eki jolaqty jol tórt jolaqqa keńeıdi. Kókjyra aýylynda mádenıet úıi boı kóteredi. Aqsýat aýylyndaǵy ortalyq aýrýhanaǵa kúrdeli jóndeý bastaldy. Aýdanda 48 otbasy jańa páterge ıe bolady, – deıdi ol.
Sonymen qatar Ekpin jáne Oıshilik aýyldarynda sporttyq keshender salynatynyn jáne Tebiske ózeni arqyly ótetin kópir de jańaryp jatqanyn jetkizdi. Buǵan qosa qurylysy toqtap turǵan Aqsaýt mektebi (bul týraly gazetimizde másele kóterilgen edi) men Ekpin aýylyndaǵy apatty mekteptiń jańa ǵımaraty bıyldan qalmaı salynatyn súıinshiledi.
Festıvaldiń eń tartysty sátteriniń biri – ulttyq kúres túrinen ótken «ASSYL ARLAN» respýblıkalyq týrnıri boldy. 74 kelige deıingi salmaqta 24 balýan «О́giz balýan» ataǵy úshin beldesse, +74 keliden joǵary salmaqta 18 balýan «Túıe balýan» ataǵyn sarapqa saldy. 74 kelige deıingi salmaqta: 1-oryn – Nurdáýlet Baqtybaı (Shymkent qalasy) – Avtokólik. 2-oryn – Erzat Arǵynov (Abaı oblysy) – 2 000 000 teńge, 3-oryn – Dıdar Tuqyshev (Abaı oblysy) – 1 000 000 teńge, 3-oryn – Bekzat Shakezaev (Qyzylorda oblysy) – 1 000 000 teńge.
+74 keliden joǵary salmaqta: 1-oryn – Ádil Orazbaev (Abaı oblysy) – Avtokólik. 2-oryn – Nurdáýlet Jarylǵapov (Mańǵystaý oblysy) – 4 000 000 teńge, 3-oryn – Maqsat Isaqabylov (Qyzylorda oblysy) – 2 000 000 teńge, 3-oryn – Saıat Shamshıev (Abaı oblysy) – 2 000 000 teńge. Bıyl býlan báıgesine avtokólik tikken demeýshi Meıirjan Bereketov degen kásipker boldy.
Al keshkilik aýdan turǵyndary ánshi, dombyrashy Gúldana Noǵaıbaevanyń «Elge sálem» konserti men dástúrli mýzykany zamanaýı baǵytta aıshyqtaıtyn «Qazaqsha Terapııa» teatrlandyrylǵan án-jyr keshin tamashalady.
Festıvaldiń úshinshi kúni de aımaq halqy úshin qýanyshqa toly boldy. Jurtshylyqtyń asyǵa kútkeni – Ekpin aýylyndaǵy atshabarda ótken Assyl Tulpar alaman báıgesi. Dúbirli dodaǵa elimizdiń ár aımaǵynan kelgen sáıgúlikter ózara alaman básekege tústi. Qunan jarysta Almaty oblysy Jambyl aýdany Kózaıymnyń baby men baǵy qatar shaýyp, birinshi kelse, top báıgede Abaı oblysy Aqsýat aýdany Kóktúbek aýylynyń Qalqaman degen sáıgúligi top jardy. Al alaman báıgede Jambyl oblysynan kelgen Baqtory degen tulpardyń baǵy janyp, kómbege birinshi jetti. Top báıge men Alaman báıgede top jarǵan eki tulpardyń ıesine de avtokóliktiń kilti tabys etildi.
Budan soń tanymal sportshylar Ekpin aýylynyń mádenıet úıinde halyqpen júzdesse, Sanjar Kerimbaıdyń «Qanysh jáne ǵylymı maıdan» taqyrybynda oqyrmandarmen kezdesýi ótti. Al «Dala» teatry festıvaldi Ydyrys Dosqanuly atyndaǵy stadıonda «Abaı álemi» qoıylymymen túıindedi. Keshte Maıra Ilııasova, Ulyqpan Joldas, Móldir Áýelbekova, Qýandyq Rahym, Raim, Jandos Qarjaýbaı, Dıdar Serikqalı, Aınur Saǵıqyzy syndy qazaq estrada óneriniń ánshileri Aqsýattyń aspanyn ásem ánge bóledi. Is-sharanyń bas demeýshisi – Dýlat Tastekeı negizin qalaǵan TAS GROUP kompanııasy men ASSYLTAS qoǵamdyq qory jáne basqa da jergilikti kásipkerler atsalysty. Uıymdastyrýshylardyń aıtýynsha jıynǵa 7-8 myńdaı adam qatysqan. «Asyl besik – Aqsýat» festıvali osylaısha Aqsýatty dúbirletip, Abaı jurtyna umytylmas sát syılady.
Abaı oblysy
