Solardyń biri – Pavlodar oblysy Tótenshe jaǵdaılar departamenti Ertis aýdany №9 órt sóndirý bóliminiń órt sóndirýshi-qutqarýshysy Azamat Smaǵulov. Ol – batyrlyq pen shyǵarmashylyqty qatar alyp júre alatyn azamat.
Jasy 28-degi jas maman qyzmetke kiriskenine kóp bolmasa da, óz isine jaýapkershilikpen qarap, batyldyǵymen, adaldyǵymen kózge túsip úlgerdi. Kún saıyn qaýiptiń qursaýynda júrip, otty óshirip, adam ómiri men múlkin qutqaryp keledi.
Al qyzmetten tys ýaqytta Azamattyń basqa bir qyry ashylady. Ol – sýretshi. Qolyna qylqalam men qaryndash alyp, shabyt álemine shomady. Arnaıy kórkemdik bilimi bolmasa da, sýret salý tehnıkasyn óz betinshe meńgergen. Onyń týyndylary – ishki jan dúnıesiniń kórinisi, sezim men tebirenistiń boıaýǵa aınalǵan beınesi. Bul – shyǵarmashylyq arqyly rýhanı tepe-teńdik ornatyp, kúızelisti jeńýdiń joly.
Azamat Smaǵulov – TJM qataryndaǵylardyń arasynda ómirin qaterge tigip qana qoımaı, óziniń ónerimen ózgelerge rýh berip júrgen shyǵarmashyl jannyń biregeıi. Bul – qarapaıym qyzmetkerdiń tulǵalyq bıigi men adamı bolmysynyń aıǵaǵy.
