Sýret: brak-zakon.kz
Ádilet mınıstrliginiń Májbúrlep oryndatý komıteti atqarýshylyq qujattardyń oryndalýyn qamtamasyz etý salasyndaǵy memlekettik saıasatty iske asyrýdy jáne osy saladaǵy qyzmetti memlekettik retteýdi júzege asyrady. Bıylǵy I toqsanda sot oryndaýshylary 5,9 mln qujatty qaraǵan. Onyń ishinde tolyq kólemde oryndalǵandary – 489 myń. Nátıjesinde, memleket kirisine 10,6 mlrd teńge óndirilgen.
– Áleýmettik mańyzdy sanattardyń biri sanalatyn alıment óndirip alý boıynsha 285 myń qujat tirkeldi. Olardyń ishinde 278 myńǵa jýyq qujat merziminde óndirip alynyp jatyr. Iаǵnı alıment boryshkerdiń jumys ornynan aı saıynǵy jalaqysynan ustalady. 2025 jyly alıment boıynsha óndirip alynǵan bereshek somasy 1,6 mlrd teńgeden asady, – dedi M.Balabekov.
Spıkerdiń aıtýynsha, qazir elimizde alıment tóleýden jaltaryp júrgender sany 15 myńdy quraıdy. Olardyń bereshegi shamamen 19 mlrd teńgege jetken. Osy oraıda sot oryndaýshylary ishki ister organdarymen birlese otyryp, boryshkerlerdiń avtokólikterin arnaıy aıyppul turaǵyna qamaý boıynsha reıdtik is-sharalar júrgizedi. Ári qaraı bereshekti óndirip alý úshin múlikti ótkizedi.
Qazirgi tańda jeke sot oryndaýshylary boryshkerdiń tabysyn qasaqana jasyrýyn boldyrmaý maqsatynda olardyń elektrondyq aqshalary men jasyryn kiristerin anyqtaýǵa baǵyttalǵan jumystardy qarqyndy júrgizip jatyr. Boryshkerlerge qatysty qoldanylatyn sharalardyń eń sońǵysy – olardy ákimshilik jáne qylmystyq jaýapkershilikke tartý. Bıyl 1 596 boryshker ákimshilik jaýapkershilik arqalady.
