Foto: sk.kz
«2023 jyldan búginge deıin 2,2 trln teńge bolatyn barlyq salalar boıynsha 25 iri joba júzege asyryldy. Bul – halyq pen ónerkásiptik kásiporyndardy gazben jáne energııamen qamtamasyz etý, resýrstyq bazany ulǵaıtý, munaı óńdeý, logıstıkalyq ınfraqurylym jáne batys óńiriniń turǵyndaryn sýmen qamtamasyz etý jobalary», dedi «Samuryq-Qazyna» basshysy Nurlan Jaqypov.
Nurlan Jaqypov ataǵan iri ınvestısııalyq jobalar ishinde Atyraý jáne Mańǵystaý oblystaryndaǵy sý tapshylyǵy men ony tutynýdyń artýyna daıyn bolý úshin Astrahan–Mańǵyshlaq sý qubyry bar. Sondaı-aq, Kendirli eldi mekeninde sý tushylandyrý zaýyty salyndy.
CASPI BITUM zaýytynyń qýaty 1,5 ese artyp, jylyna 750 myń tonnaǵa jetken. Bul ishki naryqty jol bıtýmymen qamtamasyz etýge múmkindik berip otyr.
Qazaqstannyń batys óńirlerin gazben turaqty qamtamasyz etý maqsatynda «Sarsha» jáne «Jyly jaǵajaı» eldi mekenderin gazben qamtý jobasy aıaqtalyp, «Maqat–Soltústik Kavkaz» magıstraldi gaz qubyrynyń qosalqy qubyr jelisi men «Beıneý–Jańaózen» qubyrynyń ekinshi jelisi salynǵan.
Almatydaǵy JEO-2 men JEO-3 stansııalaryn tabıǵı gazǵa kóshirý úshin gaz ınfraqurylymy salynǵan.
Sıan qalasynda kólik-logıstıkalyq termınaly, Aqtaý portynda konteınerlik hab jáne Almatyda logıstıkalyq keshen iske qosylǵan. Bul - Eýrazııada Qazaqstannyń senimdi tranzıttik hab retindegi mańyzyn nyǵaıtty.
«Bogatyr» razrezinde kómir óndirý, tasymaldaý jáne tıeýdiń sıkldi-aǵymdyq tehnologııasyna kóshý jobasy aıaqtalyp, kenishtiń qýaty jylyna 32 mln tonnadan 40 mln tonnaǵa deıin artqan.
Ekibastuz 1-MAES stansııasynyń 1-energetıkalyq blogy qalpyna keltirildi. Stansııa sońǵy 30 jylda alǵash ret segiz blokpen (4 GVt deıin) jumys isteı bastady.
Qazaqstannyń Batys aımaǵynyń elektr jelisin kúsheıtý maqsatynda jańa elektr jetkizý jelileri iske qosylǵan.
